全民居家煮嘢食｜肥媽快靚正食譜再公開氣炸鍋龍蝦5分鐘搞掂

2022-03-19 22:00

肥媽Maria Cordero和陸浩明（6號）主持的節目《全民居家煮嘢食》昨晚圓滿結束。向來奉行「快靚正」的肥媽，最後兩集教大家如何用近年大為流行的氣炸鍋，僅以5分鐘便極速兼簡易地將急凍龍蝦尾炮製成「蒜香牛油龍蝦」，超級爽口！肥媽還教大家只需剪開龍蝦殼後再用小刀切斷內裏的衣，就能簡單快捷取出龍蝦肉。

肥媽教用氣炸鍋整「蒜香牛油龍蝦」。

用氣炸鍋5分鐘就搞掂。

至於最後兩集的創意美味罐頭料理，分別有「韓式一品鍋」、「五香肉丁炒雞髀菇」、「粟米魚肚羹」及「西蘭花炒午餐肉」。肥媽製作「韓式一品鍋」時透露，曾有韓國人教她韓國午餐肉不應該煎、反而是煮湯才最好吃；肥媽又分享保持西蘭花爽口翠綠的秘訣，是落鑊前先將西蘭花用油和糖灼10秒左右，再用凍水沖洗後回鑊便可。

肥媽自爆獲韓國人指點，韓國午餐肉煮湯先係最正。

炒西蘭花保證翠綠又爽口有秘訣。

最後兩集的電飯煲美食，則有「藜麥栗子冬菇雞飯」及「鹽焗雞」，當中以「鹽焗雞」最為驚艷方便，肥媽教路想雞肉入味，放入電飯煲前必須將所有調味料及薑葱、以「按摩方式」均勻塗滿雞身；雖然「鹽焗雞」聽落似是大陣仗菜式，但經肥媽調教後，整個料理烹調過程只需短短18分鐘便完成，果然是「整雞高手」，味味道媲美大廚級數，十分適合作為抗疫期間的家常「便飯」。