獨家丨秦沛全身黑行商場搵有領衫仔女輪住結婚自己行街

2022-02-28 00:30

秦沛(Paul哥)兒子、姜麗文哥哥姜文杰（Benji），趁住「全2特別日子」（2022年2月22號，正月22，星期二下午2:22分），在IG宣佈婚訊，76歲的新老爺秦沛應該相當開心。日前下午，戴住黑帽黑口罩，着住黑衫黑褲加孭黑袋的Paul哥一支公去又一城行街，因為人流唔多，冇乜人發現Paul哥，佢行得好自在。採訪:譚壹致

姜文杰與太太李泳淇。

新婚的姜文杰表示待疫情過後才計劃擺酒，又透露簽紙儀式只有雙方的爸爸見證，對於爸爸有無喊，Benji指進行儀式時太專注望住老婆，「就算爸爸喊咗我都未必睇到」！而年初，已訂婚的囡囡姜麗文在《萬千星輝頒獎典禮2021》獲得「飛躍進步女藝員」，當時佢喺台上講入行74年嘅爸爸就算而家每次收到新劇本仍然會好興奮，又激讚爸爸係一個專業又有熱誠嘅好演員。

姜麗文在爸爸秦沛及哥哥姜文杰見證下奪得「飛躍進步女藝員」獎。

齋行冇收穫
仔女大晒又有自己嘅家庭，秦沛可能唔想打搞啲仔女，日前下午就見到佢一支公去又一城行街，佢目標好明確，上咗幾段自動電梯就直入H&M，見佢周圍望，主力搵上身衫，搵咗一陣都搵唔到，有店員行過即捉住問，從Paul哥指住自己條頸可見佢示意想搵有領嘅衫，雖然店員有指示，但最後都睇唔啱。因為疫情關係，商場人流唔多，冇被發現嘅Paul哥行得好舒服。