獨家丨施匡翹慶幸爆疫前完成處女個唱謝高晉開心隔離營配套有改善

2022-02-22 21:00

2020年7月施匡翹（Zaina）成為香港首位確診藝人要住院，更「帶挈」師弟謝高晉列為親密接觸者要入住隔離營。眼見近日再爆疫，Zaina都好唔開心，希望疫情盡快過去，身體健康最重要；至於謝高晉留意到隔離營配套有改善，對隔離人士嚟講都係好事。採訪：方騫平攝影：沈健程化妝、髮型：Wingkee Makeup 服裝：Harrison Wong (謝高晉) 形象：Janae陳灝而

施匡翹、謝高晉新一年齊心抗疫。

對於虎年願望，施匡翹望有創作歌。

謝高晉今年會拍戲及出新歌。

施匡翹、謝高晉新一年大派心心。

施匡翹當日康復出院後仍被困隔離營近一個月，情緒曾受影響，幸而對她未有留下陰影，縱使近日疫情嚴峻，她只會提高抗疫意識，勤洗手及保持家居清潔：「我冇戴兩個口罩，如果冇工作咪盡量留喺屋企，唔好周圍去，好彩演唱會及拍劇工作喺農曆年前已完成，𠵱家都係準備新歌做吓啲幕後工作。雖然演藝界好多嘢都突然煞停咗，但take care身體最重要，只望疫情可以快啲過去。」謝高晉諗返起當日隔離營生活都怕怕：「我有留意關於隔離營嘅新聞，𠵱家嘅設施有齊配套比第一批入住嘅時候好得多，住喺入面嘅人心情應該會好少少。」

當年確診時，施匡翹住院期間未有服用藥物。

當日謝高晉列為親密接觸者要入住隔離營，冇冷氣又要捱杯麵。

施匡翹趕及第5波疫情爆發前完成兩場處女個唱。

古天樂樂於助人

談及新年願望，兩人異口同聲只想第5波疫情可以盡快過去，大家身體健康心想事成。28歲嘅謝高晉去年簽約古天樂旗下嘅天加一成為DaDa(陳靜)師弟，今年除咗出新歌仲會拍ViuTV新劇及兩部電影：「我渴求同古老闆拍戲啦！上次同古老闆慶生時，我好似小fans咁，佢就鼓勵我要多返啲自信，古老闆真係好好人，佢會用能力幫返身邊有需要嘅人，而非一人獨享。」Zaina希望新一年有創作歌，但新歌唔使行性感，盡量唔好露上身，在旁嘅謝高晉就大讚師姐好索。