青春不要臉｜丁子朗咀到伸脷舟瑜CP復合一路錫一路除衫

2022-02-04 14:00

以年青人在電視台追夢為故事骨幹的TVB劇集《青春不要臉》，昨晚（3日）第十三集主題為「夾心人」，主要圍繞柳德榮（余德丞飾）、姜之雁（劉穎鏇飾）、許士賓（林正峰飾）等走紅後，如何就簽約問題與公司角力，當中涉及兄弟情及飲水思源等議題，在網上引起一定程度迴響。不過昨晚最搶Fo的，是溫楚瑜（戴祖儀Joey飾）及齊輕舟（丁子朗飾）的超激情親熱戲。

丁子朗戴祖儀超激親熱戲。

二人由門口錫到入客廳、再跌落梳化。

其實自「舟瑜」於上周分手後，不但當事人感痛苦，連觀眾也甚感不是味兒，紛紛私訊兩名當事人求復合。昨晚小瑜終因為一場接吻戲中戲，醒悟自己心中還有舟仔，結果小瑜與男友Bowie（胡㻗飾）分手，並向舟仔示愛：「嗰個人唔係你真係唔得」，激發舟仔許下承諾：「如果有一日，你做咗女主角，我做咗男主角，不如一齊番吖！」

結果鏡頭一轉，小瑜及舟仔即接到電話齊齊升呢主角，壓抑了多時的感情頓時變得一發不可收拾，舟仔甫衝入小瑜家二人即埋身肉搏，不但寬衣解帶，小瑜更跳上舟仔身，二人轉住由門口錫到入客廳、再跌落梳化，之後更甜笑對望，既激情又溫馨，據知丁丁更因太投入，撞到Joey嘴都爆埋；網民亦睇到嘩嘩聲，仲話：「見到丁丁伸脷」！

小瑜與男友Bowie（胡㻗飾）分手。

錫唔停

對被指錫到「脷伸」，丁丁笑言：「首先我想多謝戴祖儀，佢畀咗好多信任，所以先出嚟效果咁正，好難得拍戲遇到咁好嘅對手。我頭先同親朋戚友一齊睇呢場戲都真係有啲尷尬，係幾特別嘅體驗。」丁丁又直指二人埋位前有足夠「準備功夫」及「訓練」：「我哋食晒香口膠，加上我哋之前都好多親密戲，叫做有Warm Up，所以拍得都幾順利。」

Joey笑言劇中所有動作場面，均出自監製及導演林肯「手筆」：「我哋兩個都唔係好識點為之激，場口嘅動作指導其實係監製，佢叫我要擒上去丁丁度同埋轉身，咁我哋就自己慢慢試。個拍攝過程都算順利，拍咗兩三take左右。」舟瑜的接吻戲中戲其實是向經典劇集《他來自江湖》致敬，當Joey成面血地喊住問舟仔：「咁係咪冇人要我，你要我先？」以及舟仔說畢「冇人要你，我要你」後的行雷閃電畫面，完全令觀眾回憶返晒嚟。