On仔媽媽等輕鐵被小朋友撞斷骨鬧爆對方家長不顧而去

2022-01-28 21:00

C AllStar嘅陳健安(On仔)日前先出Po陪媽媽覆診順便遊長洲，兩母子玩得好開心，不過尋日，安媽喺輕鐵月台等車被小朋友撞低，小朋友嘅媽媽仲不顧而去，好彩有路人照顧安媽仲幫手Call白車。去到醫院Check晒，安媽情況係，「手肘斷骨，手腳擦損，頭撞地，幸好清醒沒大礙，等做手術。」

之前On仔同媽媽去咗長洲玩。

因為新界人出城所以On仔好High。

安媽要快啲好返呀。

On仔出Po講述媽媽受傷經過。

On仔好擔心，因為安媽第一次斷骨，疫情之下又無得探病，更加擔心媽媽一個人喺醫院。On仔有啲嘢想講，「唔該唔好衝，大人麻煩睇住小朋友，雖然係意外，但整親人要負責任，唔係走咗去，睇唔到就當無事，打呢篇文嘅原因係要你知道事態嚴重。」On仔言語間真係唔開心兼擔心，佢仲話媽媽凖備整蘿蔔糕過年，難怪以一個唉字結尾。

之後佢再出Po，講述喺急症室見到媽媽嘅情況，「手肘的確有啲腫，可以伸直屈曲，手指亦郁到，話唔痛，仲可以自己除到衫。」不過醫生回覆佢話安媽斷骨嚇到佢呆一呆，安媽面色都一沉，On仔再問，「係裂定斷？」醫生答係斷。最後On仔諗返轉頭，點解安媽仲可以郁？「係佢真係好忍得痛，唔想我哋擔心，定係到咗某個年紀痛楚神經都減弱，唔知痛？」有冇人答到佢？