On仔妈妈等轻铁被小朋友撞断骨 闹爆对方家长不顾而去

C AllStar嘅陈健安(On仔)日前先出Po陪妈妈覆诊顺便游长洲，两母子玩得好开心，不过寻日，安妈喺轻铁月台等车被小朋友撞低，小朋友嘅妈妈仲不顾而去，好彩有路人照顾安妈仲帮手Call白车。去到医院Check晒，安妈情况系，「手肘断骨，手脚擦损，头撞地，幸好清醒没大碍，等做手术。」

之前On仔同妈妈去咗长洲玩。

因为新界人出城所以On仔好High。

安妈要快啲好返呀。

On仔出Po讲述妈妈受伤经过。

On仔好担心，因为安妈第一次断骨，疫情之下又无得探病，更加担心妈妈一个人喺医院。On仔有啲嘢想讲，「唔该唔好冲，大人麻烦睇住小朋友，虽然系意外，但整亲人要负责任，唔系走咗去，睇唔到就当无事，打呢篇文嘅原因系要你知道事态严重。」On仔言语间真系唔开心兼担心，佢仲话妈妈凖备整萝卜糕过年，难怪以一个唉字结尾。

之后佢再出Po，讲述喺急症室见到妈妈嘅情况，「手肘的确有啲肿，可以伸直屈曲，手指亦郁到，话唔痛，仲可以自己除到衫。」不过医生回覆佢话安妈断骨吓到佢呆一呆，安妈面色都一沉，On仔再问，「系裂定断？」医生答系断。最后On仔谂返转头，点解安妈仲可以郁？「系佢真系好忍得痛，唔想我哋担心，定系到咗某个年纪痛楚神经都减弱，唔知痛？」有冇人答到佢？

On仔再出Po表示好担心。

欣宜、岑珈其、Serrini等圈中好友都留言祝福安妈早日康复。

友好留言祝福On妈。

On仔多谢大家关心，「睇住每个留言真系真系有帮我分担咗啲担忧。」

 

立即下载 | 全新《星岛头条》APP : https://bit.ly/3yLrgYZ