谷德昭《爆谷一周》首播獲好評網民求邀查小欣做嘉賓

2022-01-23 16:00

谷德昭主持的ViuTV訪談節目《爆谷一周》昨晚（22日）首播，其實早前節目公佈開播日期已經引起網民討論，因為個節目名同2012年由資深傳媒人查小欣主持的TVB節目《爆足一周》好相近，不過該節目只播咗4集就被腰斬，原因相信是被網民圍插冇料爆有關。

查小欣主持的《爆足一周》於2012年播出。

節目播咗4集就宣佈腰斬。

而《爆谷一周》播出首集，明顯節目性質同《爆足一周》完全唔同，網民都大讚好睇，而且因為太耐無呢類訪談性節目而感有趣，但亦有網民搞笑表示希望谷德昭請查小欣做嘉賓，未知網民是否好想知《爆足一周》腰斬的內幕同查小欣的感受呢？

谷德昭主持的《爆谷一周》昨晚（22日）首播。

網民大讚好睇。

有網民想睇查小欣做嘉賓。

而昨晚（22日）《爆谷一周》播出起首，谷德昭就分享製作這個節目的原因：「主持《納米無明火》認識到一個好好嘅團隊，我哋好想好開心咁再合作落去，所以我哋決定搞一個，好心地、貼地、希望有正面影響嘅節目。」而第一集谷德昭就請來昔日好拍檔吳君如，以及與她合作拍賀歲片的Edan（呂爵安）、鄭晉軒導演做嘉賓。

谷德昭去年主持《納米無明火》大獲好評。

首集請來吳君如、Edan及鄭晉軒導演做嘉賓宣傳賀歲片。

吳君如一出場就與谷德昭聚舊，二人憶起昔日一同主持電台節目《嘩！嘩！嘩！打到嚟！》及拍電影的趣事，二人互動非常搞笑。其後又請出Edan一起聊天，當中吳君如談到選用Edan的原因：「我睇返啲（試鏡）片，佢真係做得好自然。」當時Edan才剛拍完《大叔的愛》，得知有幸獲電影試鏡機會，都非常開心，又稱起初不知道是賀歲片，亦不知卡士咁強勁。

鄭晉軒導演分享與吳君如點解會合作拍賀歲片。

雖然電影未上映，不過主持谷德昭表示早已搶先睇咗，並指Edan演得好好，更指Edan一定會被提名金像獎新人，而其中一幕Edan爆肚一句：「粉絲好食！」更令他笑到完場。吳君如就代為解釋「粉絲好食」這句雙關語Gag的由來：「我哋戲中有個演員食齋嘅，我哋大魚大肉，但嗰位演員就成日叫人買粉絲佢食，我每日見到佢都係食米粉同粉絲，我話佢『你又食粉絲』，佢話『粉絲好食呀』。跟住佢話『死嘞，講漏咗嘴添，咁敏感，唔講嘞』，之後我返屋企諗咗一晚，幾好笑喎。」引來全場觀眾爆笑，網民都表示好想知呢位演員係邊個呀！