青春不要臉｜劉穎鏇著返泳衣選港姐 伍樂怡發白日夢啱演小龍女

以80年代TVB藝員訓練班為背景的青春喜劇《青春不要臉》，將接棒《異搜店》17日晚首播！劇情講述一班各有夢想的年青人，透過在電視台的各種不同經歷，以汗水、淚水、歡笑及溫情交織出的成長故事。

四位女主角分別是外冷內熱戀姐狂姜之雁（劉穎鏇Tiffany飾）、爽朗豁達但內心脆弱的星二代溫楚瑜（戴祖儀飾）、仙氣逼人至超乎想像的當紅花旦姜之妍（伍樂怡Kelly飾），及「遇神殺神、遇佛殺佛」的剛強女幕後陳嘉敏（游嘉欣飾）。之雁為了能待在姐姐之妍身邊，千方百計找人提名參選港姐，最終排除萬難躋身三甲。

大粒癦的Joey展示超強搞笑實力。

游游個角色唔單止有才華、仲要好公道同正義！

宣傳照所見，2016年港姐亞軍得主Tiffany，無論旗袍或泳衣均Carry得頗有美感，其中一款無敵Shoulder Pad長褸造型更是吸睛；兩位監製亦力讚Tiffany在劇中「愈戰愈勇」，後期更會散出一股獨特的巨星魅力，相當有氣質。於外國長大的Tiffany，雖已非首度拍劇，但應付中文劇本對她來說仍有一定難度，幸好是次獲監製教路得到顯著進步：「排戲嗰陣阿肯（監製林肯）話我讀中文對白時個語氣唔啱，佢叫我試吓譯番做英文，之後語氣就啱番。」

之雁都有甜美面。

Shoulder Pad長褸裝。

Joey飾演的楚瑜與其真人一樣豪邁爽朗；不過由於背負著星二代包袱，楚瑜飽受嘲諷兼要啞忍不公平待遇。在劇中會慢慢轉型為搞笑藝人的楚瑜，在宣傳照中展示了超強搞笑實力，無論大粒癦或是鬈髮嬌俏Look均演繹夠盡夠放！Joey笑指監製給予她的任務，是要放下外貌包袱：「我成日都擔心自己出鏡會包包面或者唔靚，所以會好在意兩側嘅頭髮有冇遮好塊面。後來監製話只要代入角色，做好啲戲，令個角色人物性格立體化，觀眾就會鍾意你，靚或者唔靚唔係重點。」

戴祖儀喺新劇入面，被要求放下外貌包袱。

戴祖儀飾演性格善良爽朗「星二代」，但經常被欺負。

飾演電視台當家花旦之妍的Kelly，其造型仙氣十足，無論古裝或是80年代Look均甚為省鏡。除了造型吸引，之妍的人設亦相當「屈機」，善良純真有禮貌之餘，亦極富正義感，唯一缺點只是性格帶點迷糊。原來Kelly真人性格特質與劇中角色十分相近，加上獨特的「慢半拍」演出節奏，因而獲監製睇中！Kelly笑謂：「我聽監製講一直想搵人演小龍女，佢哋覺得我外形適合，就叫我試鏡。試完鏡之後，佢哋話我連性格都好適合，因為我咩都慢半拍，個樣又好似成日發白日夢咁，同之妍好似。」

宜古

宜今

游游飾演的嘉雯目標清晰、性格剛烈，故此造型純撲得來帶點霸氣。繼《香港愛情故事》後二度與監製林肯合作，游游透露是次監製給她的功課，是能夠順利完成喊戲：「之前《港愛》有場喊戲，我點樣都喊唔出，當時我叫阿肯打我鬧我，但佢又話唔識打人同鬧人，結果搞咗好耐。今次套劇都有一場喊戲，我就順利過咗關，拍出嚟監製都有讚話效果好，我都好期待出咗街會係點。」

游游今次喊戲有進步。

游游今次同林正峰依然有大量對手戲。

立即下載 | 全新《星島頭條》APP : https://bit.ly/3yLrgYZ