古天后日誌｜望北水來年積極買貨助港股扭轉劣勢

12月30日，天晴，早上清涼，日間乾燥，氣溫回升。美股隔晚個別發展，道指再升90點點，連續第六個交易日上升；標指今年內第70次創收市新高，升6點；不過債息抽升，不利高增長股，科技股偏軟，納指跌15點。市場觀望疫情對經濟影響，同時憂慮通脹升溫下，聯儲局加息步伐或加快，債息抽升至一個月高位，科技股受壓。雖然美股表現仍然強硬，但港股喺ADR腳軟，恒指再逼近23000水平，睇嚟港股喺期指結算日，或再下試23000水平尋找支持。

噚日港股喺缺乏北水支持下，成交縮水至只有629.45億元，而北水將暫停至下星期二至回復正常，睇嚟呢幾日港股都係水盡鵝飛，靜靜局局。睇返北水今年買貨力度大減，難怪港股表現亦無厘神氣，今年北水淨買入金額只有4532.5億元，按年倒退32.5%。截至上周五連續24個交易日，雖然北水錄得淨買入577.19億元，但單計下半年則錄得淨賣出115.11億元。

睇返下半年時間，北水力沽高增長股，特別係科網股，主要係內地重手整治科技跟地產等多個行業，拖累內地經濟增長顯著放緩，北水賣多過買亦屬正常。按港交所「互通互通」網站上的不完全統計數字，藍籌股騰訊控股(00700)、美團(03690)、小米集團(01810)和安踏體育(02020)期內合共錄得淨賣出455.93億元。

而北水重倉股份，大部份為新能源概念股，其中39隻北水持倉超過5%互聯互通股份中，12隻(即約30%)具備新能源概念，其中10月喺「新發展戰略綱要」揚言兩年後「清潔能源收入佔比超過50%、綜合智慧能源收入佔比超過15%」嘅中國電力(02380)，「北水」持倉比重更大增至18.69%。跟中國電力有相似主題的華潤電力(00836)和華電國際(01071)，亦見「北水」持倉佔比升逾10%。

此外，新能源汽車概念股，亦獲北水捧場，自研新能源車的廣汽集團(02238)跟長城汽車(02333)的嘅「北水」持倉比例亦分別上升8.08%及3.44%，至29.41%和47.06%，現時兩股仍較A股折讓逾五成。近日北水重新流入港股，主要係港股估值便宜，較A股存有較大折讓，預期喺內地經濟增長放緩下，來年初或推出更多穩增長政策，流動性或再改善，港股有望受惠北水進一步南下，或有望扭轉持續跑贏嘅劣勢。

P.S. 明日大除夕，港股只有半日市，《古天后日誌》將暫停一日，明年再見。

古天后

(徐狄怡，證監會持牌人)