獨家丨張偉文忘掉疲倦感動流淚 直擊個唱後台獲貼身照顧

69歲「靚聲王」張偉文因腰椎病不良於行要坐輪椅代步，不過仍堅持自力更新，相隔兩年多再開騷，本周一晚順利完成於文化中心嘅首場《友情有義演唱會》，張偉文悲喜交集，一開始演繹《每當變幻時》就三度泣不成聲，對好友方俊（Aman）貼身照顧，冇唱歌40年嘅姚煒出山相助好感動。採訪：方騫平 攝影：葉君海 張偉文演出前除咗要食喉糖提神，仲要方俊及型男哄他笑。   張偉文甫出場就爆喊。 年前張偉文(Donald)因為雙腳無力跌倒導致腦積血，要緊急入院放血保命，手術後遺症記憶力大不如前，今次張偉文順利完成首場個唱，原來負責照顧張偉文嘅好朋友Aman費盡心思，背後做咗唔少功夫。 好友方俊亦做埋張偉文服裝設計，呢套收音機電路板衫帶出cyber嘅感覺。 方俊好有義氣 本報記者當晚現場直擊，為咗唔想令到張偉文太攰，他當日下午四點多先現身場館，五點半拜神切燒豬後就食飯及裝身，全程由Aman及五位猛男傍到實，張偉文演出期間，Aman一直喺後台提示他講乜台詞，喺有需要時帶佢入歌，聲音直接輸送到張偉文耳機，所以張偉文演出冇甩beat。張偉文說：「做嘢一定會攰冇問題，唯有食喉糖嚟提神，盡量穩定心情。」不過，去到演出尾聲時張偉文開始有啲倦意，搞到助手要幫佢按摩，好彩最後都搞得掂。Aman鬆一口氣說：「要短時間內同張偉文換幾套衫，而且要兼顧姚煒服裝及形象，跑嚟跑去係吃力，而且個show over run得好緊要，但最重要件事搞得掂，幫到偉文就ok。」 張偉文喺後台時拜神切豬。   當晚由幾個猛男傍實張偉文。   方俊喺後台位睇實張偉文。   冬至當天正值張偉文69歲生日，方俊請埋姚煒、尹光及環星唱片老闆張國林跟他慶祝。