古天后日誌｜港股弱勢未改 反彈寄期勿太高

12月22日，早上清涼，日間短暫時間有陽光，聖誕天氣開始轉涼，下周初氣溫更急降。雖然Omicorn疫情擴散，歐洲部份城市再度封城，但市場對疫情憂慮反而降溫，古天后都話疫情反覆只係大市調整一個解釋或藉口，實際上全世界喺疫情下生活接近兩年，已開始對疫情反應減退，並學習與病毒共存。市場避險情緒有所減退，美股隔晚三大指數大幅反彈，道指升560點；標指升81點，納指升逾2%，進帳360點。

美股好似跌唔落咁款，睇真O的，唔少二三線股份，早已陷於熊市之中，以小型股為主的羅素2000指數，有近80%的成分股在今年內下跌逾20%；而即使在納指中，也有近60%的股票下跌幅逾兩成。大摩嘅投資總監Mike Wilson提醒，市場可能低估O左聯儲局收緊貨幣政策，及經濟增長放緩對美股嘅負面影響。佢仲話大部份股票可能進一步下跌，建議投資者選擇盈利穩定嘅防守板塊，如醫療保健、房地產信託基金(REITs及必要消費品等。

至於港股呢邊，斷估都會跟美股反彈，重上23000當然係最好，但要企返穩都可能要O的時間，加上得返日半市，港股表現仍然係反覆，聖誕假期前盡量輕倉，暫時仍未宜進取。尤其假期前唔會有太多資金流入，資金會繼續喺不同板塊之間輪動，即使大市反彈，力度亦唔會勁得去邊，講到底，港股仍然積弱，短期陷入有波幅，冇升幅嘅狀態。尤其係中美關係仍然緊張，內地監管未見放鬆下，市場信心仍虛怯，港股可能要待明年開局，資金重新配置，先有機會擺脫目前弱勢。

古天后

(徐狄怡，證監會持牌人)