A0炎明熹多謝姊妹幫忙打卡 Yumi化身超模教擺甫士

TVB歌唱節目《聲夢傳奇》三料冠軍炎明熹（Gigi），最近與姚焯菲（Chantel）、鍾柔美（Yumi）和詹天文（Windy）組成四人女子組合「After Class」，除一齊拍劇集、推出新歌外，還密密接商演及廣告等，非常忙碌。


日前四小花趁不用開工，便相約到慈雲山商場玩樂、輕鬆一下。四人平均年齡僅得15歲，見到充滿浪漫氣息的「紫色空中花園」，即少女心大爆發，興奮到齊齊「嘩嘩」聲！童星出身的Yumi舞台經驗十足，面對鏡頭秒速「超模」上身，連環擺出多個靚Pose，之後又親自操刀幫大家影相，仲化身「小導師」教Windy擺出顯瘦及長腿Pose。

一向行型格路線的Gigi則表示，最愛掛滿紫色燈飾的20米長光影隧道，仍是A0（即單身且拍拖次數是零）女生的她說：「呢度最啱情侶打卡，雖然我仲未搵到男朋友，但好在有3個『聲夢』姊妹陪伴，仲幫我影咗好多靚相。」至於人稱「國民初戀」的Chantel，抱著聖誕霓虹燈牌，甜美笑容散發出陣陣仙氣；得悉現場設有DIY夢幻糖果吧，為食的她更嚷着要夾糖，Chantel解釋：「我想整嚟聖誕送畀朋友啫，相信見到咁多色彩繽紛嘅糖果，加埋我設計嘅包裝，收到嘅人都會特別開心！」