青春本我｜炎明熹聽到音樂就會喊 總導演李敏：真係喊到下巴震晒

TVB青春劇《青春本我》今晚（5日）首播，談到劇中同學仔，總導演李敏笑言由於17人當中，有15.5名完全沒有演戲經驗，甚至連半句對白也沒講過，加上拍攝時間緊絀，故開拍前難免有心理壓力。為了令整件事更順暢，李敏特意開夜車為眾新人撰寫了一份名為「演技雞精班」的備忘；正式開拍前，又專誠抽空與每位演員獨立會面。她說：「我哋有為佢哋度身打造角色，因為新人最好係做番自己；我哋另外亦有根據佢哋角色性格，個別設計唔同嘅心理狀況畀佢哋。」

李敏認為香港需要培育更多新演員，她亦坦言從一開始拍攝這劇到現在進入後期剪接等工作，對於看到一眾新演員們每次都有進步大感安慰：「好有滿足感，睇住佢哋由對白都講唔到，甚至走錯位，去到依家起碼叫有啲演技存在。最尾幾日，佢哋甚至識得互相提點，我係好感動！」
李敏續指「女子組」角色需要處理較多喊戲，當中炎明熹（Gigi）及林沚羿（Venus）的喊戲帶給她一定程度驚喜：「Gigi佢除咗第一次喊得比較混亂，因為佢耷低咗個頭喊，所以拍到嘅鏡頭好少！之後大家明白咗原來Gigi只要一聽到音樂就會喊，所以我哋每次都有準備音樂，同埋知道Gigi第一、二個take就會喊盡，所以我哋拍佢嘅喊戲要一嚟就嚟，佢真係喊到下巴都震晒㗎！」李敏又指童年時曾出演電影《蜘蛛俠2》的Venus，亦是開水喉代表：「佢哋未算控制自如，所以我哋拍攝要配合番佢哋嘅節奏。」