獨家丨張振朗忙開工暴跌20磅冇晒胸肌 被高海寧取笑愛分享爆肌照

張振朗於台慶劇《拳王》中以一身朱古力爆肌身形打擂台，衝擊今年視帝寶座，「叫糊」中的張振朗特別醒神，之前他跟視帝陳展鵬及高海寧(高Ling)拍新劇《童時愛上你》外景時，心情靚到爆係咁笑。對於被指得獎呼聲高，他不好意思說：「有肌肉睇唔代表會有獎！我係為個角色加操，其他睇得唔重。」採訪：方騫平 攝影：沈健程

張振朗、陳展鵬及高海寧之前喺尖沙咀為新劇《童時愛上你》拍外景，劇情講述作為CEO嘅振朗跟陳展鵬及高Ling開會時，試探一吓高Ling係咪真失憶，場口坐定定比較輕鬆，惟獨陳展鵬有其他劇集在身，所以請咗女助手跟場打點，亦突顯視帝地位，他解釋：「𠵱家咁嘅環境要互相團結，尊重自己嘅工作，疊住拍3個劇真係好攰，有得做梗係好過冇得做啦，所以需要請人幫手。」

堅持晒肌未必有獎

對比《拳王》爆肌造型，當日張振朗明顯縮咗水，他坦言日日開工冇時間操肌，跌咗20磅，自爆：「𠵱家啲肌肉冇晒，好彩呢個角色唔使大大隻。」張振朗為《拳王》辛苦操肌，被指值得加許做視帝。他卻強調：「有肌肉睇唔代表會有獎！操肌嘅過程令自己開心，唔會信心大咗，最重要觀眾鍾意，可能啲觀眾未必鍾意我大嚿反而鍾意我瘦呢！」在旁的高Ling即踢爆佢：「佢自己就好鍾意，成日攞啲相出嚟同人分享話自己好大隻！」展鵬則附和道：「(操肌)都辛苦㗎！」3人同聲表示合作愉快，呢個組合好有新鮮感。