兄弟全力護航丨保錡避談被韓子亮狙擊：每日都要做好自己

ERROR成員肥仔今日在《力圖打排球》的記者會上，在排球遊戲環節中，慘遭MIRROR 的Edan和Anson Lo「打孖」擊中要害；被問到「小肥仔」的狀況時，肥仔笑指幸好自己有健身令身體夠強壯。笑問曾經下體中招的193有否分享心得？肥仔笑謂：「193係用自然療法，任由嗰度愈來愈大、愈來愈腫。」193笑肥仔要好好珍惜，因只有一晚時間變大，第二晚就會變返細。在旁的保錡即食字為肥仔起花名做「九龍灣蘑菇瘦」、又自封為「九龍灣墮Lin地獄獸」；193唔執輸的自稱做「九龍灣金剛棒」，再取笑阿Dee是「太和定海神針」！阿Dee就只關心未能與謝影雪打羽毛球感失望;但提到保錡遭韓子亮追擊，ERROR即同心合力撐隊友。

對於早前被韓子亮(TL)在IG Story連環出Po狙擊，直指保錡「食女」兼「媾女」，事件發生後，首現身的保錡被問到近日是非連連，他不停遊花園的談工作避答，在旁的193搶說：「係男人都會媾女，好正常。」阿Dee更幫口：「媾女和溝通係一線之差，睇你點睇！」得到兄弟護航的保錡表示：「經過今次事件，發現ViuTV真係個好地方，我會同ERROR成員好好溝通工作上嘅動向、做得更好，心情冇受影響、仲幾開心。」

問到保錡是否不想回答韓子亮的是非？他繼續以工作避開話題，193撐隊友說：「唔係真嘅嘢就唔需要回應，每一日都有好多事衝住我哋而嚟，我哋唔care、亦唔理，自行調節心情就得。」肥仔幫口指韓子亮的事件是源於之前邀請對方參與節目所發生（搶咪事件），其實是度出來的開玩笑橋段，沒料到對方誤會了或較為認真；193再接口指如果將來有機會也希望跟對方再合作。問到有否後悔用到「搶咪」橋段？保錡搬出人生哲理說：「每一日都係新嘅一天，冇得回頭望，每日都要做好自己。」有指粉絲擔心保錡再度收埋自己，阿Dee打趣道：「九展個雪櫃冇位啦！」隨即3子口徑一致表示一定撐兄弟！