獨家丨鄧建明自隊一支紅酒好識歎 同老婆食意菜撐枱腳

有冇人一見到鄧建明(Joey)，耳邊就即刻響起佢唱《Chill Club》嘅歌聲?仲有兩年就60歲，因為負責ViuTV《Chill Club》嘅現場伴奏結他手及音樂總監，成日要出鏡加上經常同年青人接觸，所以Joey Tang Keep得好好，冇肚腩條腰又直，有型㗎。日前佢同老婆食意式Dinner撐枱腳，歎住紅酒食足近兩個鐘，老夫老妻冇拖手平排行，兩公婆都好鬼Fit。採訪:譚壹致

本周日(7日)就係Joey嘅58歲牛一，佢冇IG，FB又唔常更新，唔知佢點慶祝，但一定離唔開飲酒，事關佢好鍾意飲亦好飲得，之前《頭條娛樂》都影過佢去超市買紅酒，唔好覺得超市買酒好cheap呀，而家大間嘅超市都有好多靚酒㗎。

老夫老妻冇拖手
當日傍晚，Joey同老婆喺又一城一間意式餐廳食晚餐，兩人揀選最入位置坐低，Joey先點酒，老婆再點食物，紅酒到，Joey邊飲邊講電話，觀乎添酒頻密度，一支紅酒佢飲咗起碼7成。食近尾聲，嘢食清晒，Joey再慢慢歎埋啲酒，其間有一班人剛到坐佢附近，可能有啲嘈，Joey即叫侍應要求調位，飲多一陣就埋單走人，雖然兩個鐘唔夠差唔多Ko咗一支酒，但Joey冇異樣。離開後，兩公婆冇拖手但拍住行，睇Joey嘅側身，冇肚腩，正宗Fit佬。