【獨家】Rock友變偶像派冧功升級 Joey Tang行街見記者送飛吻
2021-07-08 19:15 
近年MIRROR人氣爆燈，個個爭住搵佢哋合作，之前太極樂隊結他手鄧建明（Joey Tang）於ViuTV節目《CHILL CLUB》中，亦以低沉Man爆聲，與ToNick合唱「佬味版」的姜濤Hit歌《蒙著嘴說愛你》，成功獲得不少網民大讚好正。未知唱完首「少男歌」是否心境都Sweet咗Young咗呢？早前他落銅鑼灣行街時，當發現《頭條日報》男記者在場，即學Idol向鏡頭送飛吻，好Cute呀！採訪：梁志明
早前傍晚約5時半，將於8月假紅館舉行《太極RAINBOW AFTER RAIN演唱會》的鄧建明，趁得閒獨自現身百德新街的I.T睇衫，夾開Band的Joey連睇衫都散發出Rock味，他擘大雙腿紮行馬，左手垂低握實部手機，全程齋用右手逐一撥開陳列架上的衫快速Scan，似乎Joey對外套都唔太感興趣。
期待下次派心心
之後行前兩步繼續睇，十次有八次着白色或黑色Tee襯黑褲的他，終於扚住件黑Tee望多兩眼，隨即再扚起條黑褲𥄫𥄫，但結果都係唔啱心水又放低。最後在店內兜咗幾圈，Joey問完女店員有冇貨後，二人再吹多陣水，一共逗留約半個鐘，他便兩手空空地離開。臨步出大門時見到鏡頭，Joey即向男記者揮手道別，仲忽然「Idol」上身隔空送飛吻，唔知下次會唔會派心心呢？
最新回應