獨家│Retroll搞YT頻道以「試當真」為目標 Jerry激讚Tyson Yoshi

近年香港人聽多咗廣東歌，亦愈來愈多人接受到唔同曲風嘅音樂，令好多獨立歌手都有出頭天，Retroll除咗玩音樂，其實仲有好多搞作，梁繼文（繼文）同潘俊維（Jerry）接受《頭條娛樂》訪問就透露未來想搞YouTube頻道作多元化發展。撰文:秦詠姿 攝影:葉君海


搞YouTube頻道維持曝光率

呢個世代唔再需要依靠大公司先有得發圍，以YouTube頻道「試當真」 為例，靠創意於網絡世界突圍，開台一年訂閱人數33萬，日前更於九展開《試當真一週年現場版》，評價超好。原來Retroll都有意搞YouTube頻道幫助維持曝光率，Jerry表示：「舉例咁講，當我哋想追上『試當真』一半。因為佢哋不論YouTube頻道定係音樂製作都好成功，我哋唔係想做『試當真』，但想做類似嘅形式。」

Retroll為咗瞓身搞YouTube頻道，喺觀塘租埋地方搞工作室，買晒器材做準備。本身做開Dancer嘅繼文同Jerry坦言就算張學友開200場巡迴Show搵佢哋跳舞，都未必會做，因為想專心Retroll嘅業務。至於拍片題材，初步構思都係以搞笑貼地為主，另外仲希望為Retroll嘅音樂作品拍多啲MV。

Jerry：我好敬佩Tyson Yoshi

近年好多獨立歌手冒起，好似行Hip Hop路線嘅Tyson Yoshi，以自己製作走上叱咤拉闊舞台。亦都證明咗而家主流同非主流嘅界線細咗，樂迷接受程度高咗，Jerry都話以Tyson Yoshi為目標：「我好敬佩Tyson Yoshi，佢係獨立音樂人玩Hip Hop、R&B，由台灣紅返香港，自己做埋製作，主流都要認同佢喎！佢就係我最想做嘅目標。」

繼文諗定Plan B開Studio

出專輯、拍MV、搞工作室、經營YouTube頻道，聽落樣樣都係錢！如果有間大公司做後盾會唔會好啲？Jerry就唔係咁覺得：「或者佢哋仲未識玩Hip Hop同推銷一個Hip Hop歌手，可能覺得香港市場唔適合，所以我先會講笑話想做獨立唱跳歌手。」

入得行做藝人就預咗有機會手停口停，問到兩人有冇Set個時限畀自己，如果達唔到目標就放棄？Jerry坦白承認舊年已經歷這個心理關口，但轉行做過一排地產，反而令佢更堅持夢想。至於繼文雖然從來冇諗過放棄，不過其實都一早諗定Plan B：「我都係想跳舞嘅，咁就算搞YouTube頻道唔成功，或者做唔到星都好，我都係想繼續跳舞。或者會搞個Studio之類，但唔會去做一份同而家偏差太大嘅工囉！」

家人支持與體諒

追夢除咗需要本錢，家人支持都好重要，問到家人點睇兩人堅持追夢，Jerry表示：「我家人係完全冇理過，類似係我想點就點，冇話好踩我，唔畀我做，亦都冇話十分支持囉！即係覺得我有料咪有收穫囉！」

對比起Jerry家人嘅放任式，繼文就好得到家人的支持，他非常感謝父母：「我係獨生子，照理應該養起頭家，因為屋企人都有返咁上下年紀，我應該要撐起頭家，其實我都有諗過正正經經打份工。」不過媽媽嘅一番話，就點醒咗佢：「佢話佢哋個年代冇咁多選擇，佢夢想係想做時裝設計，但當時搵唔到入行機會。而家自由社會，可以揀我鍾意嘅路，鍾意做就去啦！」有個明事理嘅媽媽，繼文真係幸福呀！