馬拉松丨On仔因病退賽 當奴跑輸新丁張繼聰唔忿氣：唔同佢玩

梁釗峰、商台DJ當奴（唐劍康）、張繼聰、張紋嘉、林奕匡等今日參加馬拉松比賽，有「肯亞徐」之稱的徐濠縈由過往跑開全馬減至10公里賽，而原本已報名參賽半馬的陳健安（On仔） 則因身體不適，無奈於賽前一天決定退賽。
當奴與釗峰分別參加半馬及10公里賽事，當奴以1小時49分40秒跑畢半馬，但較首度出戰半馬的張繼聰大約慢了16分鐘，笑言滿意自己的成績，但不滿意張繼聰這位馬拉松新丁比自己更快，笑罵：「佢黐筋㗎，唔同佢玩！其實佢早於多年前已發起跑山頂，佢先係老手，仲跑得好快！」

釗峰以50分48秒完成10公里，亦成為其最佳成績。他說：「好多人話西隧係地獄，所以我做晒心理準備，唔敢跑得太激烈怕應付唔到，最後成功捱過這個新地段。」提到C AllStar另一位成員On仔因抱恙退賽，釗峰指On仔為了參賽一直嚴控飲食及休息時間，因此很替對方感可惜，但也支持其退賽決定，事關半馬無得博；至於On仔有何不適就未有細問。在旁的當奴聽到On仔的嚴謹，開玩笑指尤如軍人生活，再笑謂：「佢都60幾歲，唔舒服係要休息吓！」

而On仔昨日在社交網以「倒數一日」為題宣布退賽，他貼圖留言：「為半馬訓練咗一個多月，接近三十課，選手包都攞埋，但係今日身體唔聽話、唔舒服，最後同公司傾過，建議我唔好跑，衡量過，我都同意，雖然係好可惜。想同支持我嘅族人同原本諗住喺終點等我嘅族人講聲多謝，唯有下次再跑。近日天氣變化好大，如果有唔舒服，記得唔好勉強身體，下次再跑。」雖然未能參與，但他不忘為跑手加油。