頭條戲場 丨《邂逅愛之夏》好似食完一包好甜嘅薯片

唔多講嘢但好靚仔的Victoras(Vasilis Magouliotis飾)同嫲嫲住喺希臘嘅海邊小鎮，阿媽跟佬走咗去意大利，因為嫲嫲離世，突然一身鬆晒的Victoras揸阿媽架陳年Audi去旅行，中途遇到不拘小節的德國靚仔Mathias(Anton Weil飾)，奔放德國仔夾油錢帶路，兩人愈行愈近，由眼神互flirt、到輕掂腳仔再因誤會而更加了解繼而扭計要錫錫，甜度中上，睇到笑出聲。(10月21日上映) 撰文:廖思慧

電影講述奔放德國仔搭上正經希臘仔的愛情故事。前跳水冠軍Victoras同古靈精怪的Mathias展開公路旅程。在路途中，Mathias不斷以問答遊戲嚟挑戰及強迫Victoras走出其舒適圈。一個步步進逼，一個欲拒還迎但身體最誠實，靚人靚風景加玩曖昧，散場後好似食完一包好甜嘅薯片，用嚟叉電幾唔錯。

睇完你會好想拍拖
導演Stelios Kammitsis表示戲中主角Victoras是一位前跳水冠軍，所以唔怕高，寓意就算生活上幾困難都唔怕跳進現實生活之中，好難明?其實當佢係一套BL公路電影，對白幾到肉，風景超靚，有靚仔樣又有身材，屬高質同志片，鍾意呢Type嘅觀眾必定啱睇。兩位主角冇要生要死，零激進，由反感到互相體諒，愛情係覺得你開始明白我，寂寞時有個膊頭依靠吓就好。