头条戏场 丨《邂逅爱之夏》好似食完一包好甜嘅薯片

唔多讲嘢但好靓仔的Victoras(Vasilis Magouliotis饰)同嫲嫲住喺希腊嘅海边小镇，阿妈跟佬走咗去意大利，因为嫲嫲离世，突然一身松晒的Victoras揸阿妈架陈年Audi去旅行，中途遇到不拘小节的德国靓仔Mathias(Anton Weil饰)，奔放德国仔夹油钱带路，两人愈行愈近，由眼神互flirt、到轻掂脚仔再因误会而更加了解继而扭计要锡锡，甜度中上，睇到笑出声。(10月21日上映) 撰文:廖思慧

电影讲述奔放德国仔搭上正经希腊仔的爱情故事。前跳水冠军Victoras同古灵精怪的Mathias展开公路旅程。在路途中，Mathias不断以问答游戏嚟挑战及强迫Victoras走出其舒适圈。一个步步进逼，一个欲拒还迎但身体最诚实，靓人靓风景加玩暧昧，散场后好似食完一包好甜嘅薯片，用嚟叉电几唔错。

睇完你会好想拍拖
导演Stelios Kammitsis表示戏中主角Victoras是一位前跳水冠军，所以唔怕高，寓意就算生活上几困难都唔怕跳进现实生活之中，好难明?其实当佢系一套BL公路电影，对白几到肉，风景超靓，有靓仔样又有身材，属高质同志片，锺意呢Type嘅观众必定啱睇。两位主角冇要生要死，零激进，由反感到互相体谅，爱情系觉得你开始明白我，寂寞时有个膊头依靠吓就好。