伍家朗八號風球下求婚成功 群星留言送上祝賀

香港羽毛球一哥伍家朗，今日（10日）在社交網貼出三張照片，宣報喜訊，原來他已於昨晚（9日）在8號風球下、向拍拖六年半的女友Charlotte求婚成功，真係打風都打唔甩。伍家朗透露求婚過程相當難忘：「2021.10.9 一齊左六年半終於都嚟到呢一日，今次可以話係最成功嘅surprise。竟然可以呃住你呃到儀式前一刻先開估，更加估唔到係我讀台詞讀到1999你都忍唔住喊咗。」

伍家朗直言8號風球之下的Staycation求婚，嚇到一額汗：「一早plan定嘅嘢差啲因為個颱風而被破壞晒，好彩有女朋友嘅老死由頭到尾都咁上心，落心落力幫我策劃同籌備，仲有酒店、花店老闆娘、場地佈置同攝影師冒住打風嘅危險都幫我繼續將個儀式做到120分，令到女朋友非常之滿意。」他更感謝服裝公司借出西裝，讓他着到好有型去求婚。

求婚Po發布只有四小時，已近10萬人給Like，而不少藝人也有留言祝賀，其中有麥明詩、張繼聰及太太謝安琪、李克勤及趙慧珊（Aka）等。