獨家丨岑樂怡約友食Tea係咁笑 靠《幫緊你》吸納好多Fans

ViuTV出咗好多好高質嘅主持，隨意一數就有強尼、練美娟、陳安立、Kathy仔(王頌茵)及阿妹(岑樂怡)等等，特別係後者，好多瓣數，例如靈異節目《總有一瓣喺左近》同埋反應超好嘅《幫緊你應援團》。好推崇環保嘅佢仲開咗個「岑樂怡和你Green」Youtube 頻道，分享環保資訊添。日前下午，冇乜化妝，着住Tee及短褲，真係好隔離屋「阿妹」Feel嘅阿妹約咗女友人食Tea，兩位妹豬邊食邊笑，阿妹笑到勁多表情，就快30歲，都仲好可愛。採訪:譚壹致

ViuTV之前嘅《幫緊你應援團》中最有印象係阿妹同MIRROR嘅Tiger主持嘅「大樹好遮蔭」，內容就係委託人阿妹，希望給「大樹下善待動物庇護站」應援，佢同Tiger出動為無家毛孩籌款，應援相當成功， 除咗義工感動到喊，主持阿妹都一樣，呢啲節目好有意義，真係不妨做多啲。

傾到完全停唔到
雖然阿妹幫ViuTV主持咗好多節目，但講到入屋一定係《幫緊你應援團》，反應好之餘又多咗人支持自己，下個月30歲生日嘅佢應該好開心，所以難怪佢約女友人食Tea都可以食到全程係咁笑。當日下晝兩點，着得好casual嘅阿妹同女友現身又一城，兩人各自叫咗件Cake加杯飲品，全程係咁講英文，聽唔到兩人講咩，只知阿妹好興奮，傾到郁晒手，仲係咁笑，表情超多，時而擘大口時而「依起棚牙」，偶然穿插怪表情，笑足個幾鐘先埋單離開，兩人行住街甚至等的士都傾唔完，阿妹都幾傾得喎。