《造星》CY踩入影壇做返自己

　　（星島日報報道）有「神經刀」之稱的CY（陳澤言），去年參加ViuTV選秀節目《全民造星III》打入十強，決賽當晚更憑一句「我把聲係咁」成為熱話！入行一年，CY出歌、廣告、電影樣樣試過，他將會在中環一間餐廳舉行第一次個人音樂會，用歌聲答謝一班支持他的人。

　　由素人身分參加《全民造型III》而入行的CY，參賽初期的呆呆表情經常看似「發夢」，被導師彭秀慧先後贈言「恨鐵不成鋼」和「爛泥扶唔上壁」，不過CY夠爭氣，最後憑唱歌實力打入十強！

　　雖然最後未能贏得三甲，但CY發展絕對不俗，除了擔任綜藝節目《囝囝女女730》主持，又同花姐齊齊拍廣告，前輩關心妍更邀請CY合唱歌曲《腍》，加上電影拍攝，CY都話自己好幸運：「呢一年最滿意一定要講最近參與嘅兩部電影，其中一套電影啱啱完咗，不過詳細就唔講得住，唔可以劇透住！只可以講個角色好符合我自己本身的性格，可以係套戲入邊做返我自己！」

　　CY無簽公司，換言之沒有龐大資源背後Support，幸好這一年CY有姑姐做經理人，幫她處理工作上的大小事務，令CY可以專心工作:「其實一直以來造星完了之後，所有活動工作都係我姑姐幫我，過程中佢都有同我分享好多難處，我都會安慰佢，大家都明白呢條路係難行，最緊要一齊努力！雖然有時我哋都會有拗撬，有啲位諗法唔一致，因為姑姐另外一個身分係屋企人，有時我都會唔知點同佢表達，但最終我都係好信任佢，我都會放手比佢幫我處理問題！」

　　入行一年，熱愛唱歌的CY也儲落一班粉絲支持，為了答謝歌迷，CY即將在10月2日在中環一間高級餐廳舉行第一次個人音樂會: 「揀餐廳舉行係姑姐幫我搞嘅，起初佢覺得呢個餐廳環境好適合我，成個餐廳都好靚，跟住個老闆又支持！今次呢個小型音樂會真係我第一次，其實都好緊張，會擔心自己會唔會嗰日突然之間唔舒服，但係點都好我會盡力做嗰個表演，今次係一個好好嘅聚會機會俾我見番好多呢段時間支持我嘅朋友。同埋有好多我之前嘅中學同學，朋友專登嚟撐場，我有叫佢哋唔使買飛，但佢哋都堅持一定要買飛撐場！」

　　CY亦不忘感激粉絲:「歌迷都好支持，第一個show好快已經爆咗，好開心佢哋會喺我第一個音樂會肯出嚟支持我！同埋之前見到佢哋幫我整嘅應援，真係有啲受寵若驚，之後有啲乜嘢我一定會回報返佢哋，我知道做人最緊要飲水思源！」

　　CY對於自己的音樂路，原來已經秘密做好準備:「其實不嬲我唱歌或者行歌手呢條路，我冇點同人比較，大前提都係做我自己鍾意做嘅嘢先，Enjoy咗開心咗就OK，不過我都計畫咗出年一月份推出我自己個人第一隻歌，首歌已經錄好咗，而家已經籌備緊拍MV！幸運有投資者幫手，大家初頭傾開就話試吓合作咗先，佢都有同我打個比喻，今次合作就好似拍拖咁，去到最後都係想結婚嘅，但係結唔結得成就要睇吓大家合作嘅過程！」