湯怡上遊戲節目搵奶粉錢陳家樂泳兒組隊齊撐

2021-10-01 08:30

TVB遊戲節目《思家大戰》周日（10月3日）晚播出的第五集，嘉賓有區瑞強（Albert）、王馨平、鄭子誠、甄澤權及區瑞強囝囝Adrian組成的「五Folk聲」隊，以及湯怡、陳家樂、泳兒、吳浩康、曾樂彤組成的「QQ奶粉基金會」。對於Albert與王馨平及甄澤權組成一隊，現場觀眾大感好奇，Albert笑指與馨平是高爾夫球拍檔，甄澤權則是其大學師弟。至於湯怡隊友，觀乎隊名也知眾人是擺明車馬力撐湯怡搵奶粉錢，有情有義。

是集問題看似簡單但卻難答，包括「講一樣會跌落馬桶嘅嘢」、「男人有乜技能最冧到女」，當中最考起嘉賓的竟是「講一個經常俾人扮嘅香港歌手」。正當眾人回答徐小鳳、王傑及張學友，並以為十拿九穩時，豈料八甲不入，連思捷亦愕然學友榜上無名：「竟然冇？我都一日扮十次啦！」眾嘉賓全程玩得相當投入，泳兒玩到搲晒頭，更因一個失誤獲製作組送上兩個大交叉；Albert答問題答到講故仔咁，遭思捷取笑：「你唔做編劇嘥晒！」吳浩康則大拋金句：「我都好少同女仔研究深淺！」獲全場一致掌聲。