演鬥聽丨林欣彤妒忌泳兒食極唔肥 Battle火花四濺

泳兒、林欣彤（Mag）、曾樂彤、洪嘉豪等擔任新一集《演鬥聽》嘉賓，泳兒和Mag因合作《聲夢傳奇》結緣，今次再遇有機會同台「互片」，Mag說：「我哋冇鬧對方，我唔係羨慕，而係妒忌佢，因為佢真係食極都唔肥！」泳兒則說：「我哋冇夾過，係默契，battle嗰段都係噚晚先諗，好鍾意佢首新歌《林中鳥》，呢個時候梗係宣傳新歌啦。」

二人大讚王梓軒（Jonathan）為節目落足心機，泳兒說：「我哋樂壇需要多啲新嘢，萬事起頭難，開心Jonathan願意行呢步，佢私下WhatsApp晒我哋所有歌手，好用心，有份參與覺得幾好玩。」

另外，曾樂彤笑言與洪嘉豪Battle時好似打了一場交，她說：「我係完全豁出去，淨係覺得同佢打咗場交就返埋位，簡直進入忘我狀態，出咗竅。」洪嘉豪則說：「我哋做歌手好多時喺鏡頭前太正經，明明本身唔係咁，其實可以俾人哋睇到好玩一面，我同佢friend咪不停遮住佢個鏡頭，哈哈。」曾樂彤即反駁：「所以我要『𡁻』佢。」王梓軒希望透過節目，讓觀眾看到歌手們真實個性。