梁祖堯彭秀慧將合演音樂劇場參加本地深度遊了解舊香港取經

2021-09-27 14:30

彭秀慧剛忙於執導的新戲《阿媽有咗第二個》後，未有休息馬上跟梁祖堯、湯駿業、邵美君合作演出《回憶的香港》音樂劇場，此劇將於下月6日在Star Hall演出7場。四位演員在這次重演中加入疫情內容，湯駿業說：「呢年幾疫情下香港人生活唔同咗，香港由開埠到而家亦經歷過唔同疫情，香港人係點經歷、點撐過去，又學到咩智慧俾下一代，我哋好想擺落今次演出，所以我哋參加咗本地深度遊團體『活現香港』，行咗今次疫情Tour。」

梁祖堯就對上環百姓廟特別有感覺，他表示：「當時好多單身華人嚟香港工作，從事低層同埋高危行業，所以唔少人不幸客死異鄉。百姓廟仲會為一啲來港後無處容身嘅人提供食宿，係好值得現代人學習，令我好深刻。」而邵美君參觀東華義莊，她說：「第一次親身感受，係香港獨有，義莊就好似一個中轉站，令國外過身嘅華人遺體，可以喺義莊等家人認領，最終可以返鄉下安葬，好犀利。」還有湯駿業則跟行黄霑生平Tour，他更即場獻唱不少霑叔作品。