林子博帶子女移居英國波折重重 開網上頻道分享生活難題

50歲嘅前無綫娛樂新聞台主播林子博太太董燕君（Shirley）於上年不敵癌症逝世，今年8月林子博帶埋一對仔女移民英國，離開傷心地重過新生活，遵從亡妻嘅遺願好好栽培一對子女成材。身在英國曼徹斯特(曼城)嘅林子博喺youtube開咗個《子博在英國》頻道講留英生活，首集昨晚首播，播出15小時有二千四百觀眾收看，唔少網民送上祝福及留言叫他加油。

 

子女未返到學

精神飽滿的子博對住鏡頭正式交待喺英國嘅生活，他說：「大大話話嚟咗英國一個月時間，唔少朋友透過唔同平台問我習慣咗英國嘅生活未？係咪經已Settle落嚟？小朋友係咪返咗學呢？實不相瞞，小朋友仲未返到學，𠵱家我哋仲住喺酒店。」他唉一聲續說：「原來唔係咁簡單，因為住唔起大城市倫敦，就揀咗第二大城市曼城，當日諗住先搵間酒店落咗腳，再搵租盤，但呢度嘅業主係要睇租客有冇工作，唔係話肯交一年租金就隨便租屋出去，所以就棘住咗好多相關嘅嘢，好似仔女搵學校要有正式嘅租約證明，而酒店唔算係住址證明，除非租Airbnb旅居，所以小朋友未有得報學校，𠵱家仲喺度搵緊屋嚟租。不過，日內會轉住Airbnb，始終住酒店冇爐頭煮食，除此之外冇得洗衫，要經常出去食嘢同洗衫真係好煩。嚟度我第一時間租車，但呢度啲人慢活，租車都等成個月。」

邊學邊做整餅

第一次去英國的子博，認為去到一個人生路不熟的地方，生活照應好重要，幸而英國由南到北都有朋友，他有朋友喺曼城市中心開咗間甜品外賣店，因而由朋友做盲公竹。之前朋友店鋪唔夠人手，他落鋪幫手整月餅及菠蘿包，但強調唔係轉行：「我發覺都幾好玩，但飲食業時間好長都辛苦，自己要拜師學藝，邊學邊做，至少要有認識，先夠膽效發朋友開店。」他又表示，喺英國最唔慣飲食方面，因為香港太多好西：「呢度keep住食漢堡包、沙津、薄餅、有時食到中餐炒飯、炒麵，連意粉都少食，真係好掛住香港茶餐、豆腐花、粥、油炸鬼、泰菜…連五香肉丁喺呢度嘅中國超市都買唔到，至於其他生活細節ok。」

 

唔夠分去加國

他坦言其實首選去加拿大居留，除咗有好多朋友喺加拿大，仲有相熟朋友搭咗路，可以喺當哋電台反電視台開咪及做節目，做返自己喜歡嘅工作，無奈唔夠分申請技術移民，英文程度又低唔可以讀書移民：「幸好英國教育喺世界排頭幾位，同小朋友嚟呢度未嘗唔係好事，而且我今次冇包袱離開，我喺香港冇正職兼冇物業，我只係帶住4個大行李喼及5-6袋嘢，另有枝結他。至於船運就有28箱物品，當中有衫褲鞋襪仲有相簿、數碼鋼琴、木箱鼓、卡拉ok機、遊戲機、電腦…最好家檔唔好咁快到，因為未有地方住，否則又要畀倉租。」