張敬軒跌親扭傷腰唔行得 多得貴人捽藥酒起返身

張敬軒今日凌晨在社交網發文，自爆：「尋日喺倉攞嘢，一失重心踩空向後Dun一Dun，初頭起身都仲郁得，返到屋企開始唔行得。」幸得他認識多年的一對老夫婦，四手幫他捽藥酒，終於起得返身，故他特別發文感謝：「生命入面能夠有佢兩位貴人係我嘅福氣，夜深人靜，特別有所感慨。」、「同場加映案發後痛到吖吖聲同痕到GapGap聲」的片段。

張繼聰、林奕匡、泳兒、周家怡等都留言祝軒仔保重和早日康復。網民原本都替軒仔擔心，但聽到他的笑聲又忍不住笑，留言：「明明好同情你嘅遭遇，點知聽你把聲，忍唔住笑咗」、「點解佢幫你捏緊你個時啲肉咁有動感，肉騰騰咁，照計你瘦到咁，無乜肉㗎，不過你小心啲啦，老人家」、「男人整親隻大陣你都仲可以笑到咁嘅，小心啲啊」。

張敬軒留言：
#我呢兩日其實跌鬼親
跟手扭傷咗條腰 #定係後腩

我覺得人生當中，有貴人緊要過有錢。蕭生蕭太由我嚟香港開始就關照我，我哋因為當年喺通利琴行買琴，由蕭生送貨而結緣。廿年了，佢哋幫我搬屋搬廠搬寫字樓，細至搵一個電子零件、車衫車袋車琴套，大至搬録音室/餐廳/演唱會後台/公司辦公室，佢哋都幫我處理得妥妥當當。

尋日喺倉攞嘢，一失重心踩空向後Dun一Dun, 初頭起身都仲郁得，返到屋企開始唔行得。好彩蕭生蕭太四手連㩒，按摩膏加跌打酒捽捽拑拑，起得返身。再睇埋醫生今晚已經郁得返好多了。

生命入面能夠有佢兩位貴人係我嘅福氣，夜深人靜，特別有所感慨。

#同場加映案發後痛到吖吖聲同痕到GapGap聲