頭條戲場丨《沙丘瀚戰》等救世者不如靠自己

電影改編自Frank Herbert的暢銷小說系列《沙丘魔堡》(Dune)。由《銀翼殺手2049》金像提名導演Denis Villeneuve執導，入場前非常有期望，開場不久已覺得拍攝手法和攝影好有《銀翼》味道，再加上Hans Zimmer的配樂，配上浩瀚沙漠氣勢相當磅礴，用史詩式形容都唔過份，終於明白導演點解寧願一等再等都一定要安排電影喺戲院上映，加上男主角Timothée Chalamet 360度無死角靚樣放題，唔睇IMAX係你損失。(上映中) 撰文:廖思慧


故事背景設定於數千年後，一個名叫Paul Atreides(Timothée Chalamet飾)的年輕男子捲入一場跨星系鬥爭。Paul是阿特雷斯皇族的繼承人，父母是好打得又備受子民愛戴的統治者雷託阿特雷斯公爵Duke Leto(Oscar Isaac飾)及強悍女戰士積西嘉阿特雷斯夫人Lady Jessica (Rebecca Ferguson飾)。因為被滅族，Paul被迫由卡拉丹星(Caladan)著草至遙遠的沙漠星球「阿拉基斯星」(Arrakis)。

搶資源都畀條生路吖
而「弗雷曼人」(Fremen)就係住喺「阿拉基斯星」，原住民都稱呢個沙漠星球為「沙丘」(Dune)。沙丘盛產一種非常有價值能啟發人類潛意識及令人上癮的獨有香料(Spice)，一向以嚟阿特雷斯家族及哈根尼家族都是爭奪香料控制權的兩大勢力，想獨吞有咩辦法?你懂的。故仔簡單嚟講太空有唔同的星球部族，每個部族都有唔同能力，如Paul的媽媽就識得用聲音控制人，而阿拉基斯星原居民就能控制沙漠巨蟲，亦可深入沙漠地底去逃避災難。而所有部族由一個帝國所管轄，兩個半鐘的《沙丘瀚戰》屬於第一部曲，講述帝國話事人眼見某族愈嚟愈勁好唔鍾意，諗計滅佢族，但唔係你話要滅就滅到，呢個世界總有人睇唔過眼幫拖，然後終極繼承人走甩咗，好勇嘅阿媽仲教佢唔可以懼怕，只有戰勝恐懼先可以生存，等救世者不如靠自己。

張震只係出場五分鐘
點解會拍呢套戲？導演咁講：「我細個發現呢本小說，深深被佢嘅詩意及對大自然嘅描繪所觸動，大自然係《沙丘魔堡》中真正嘅主角。嗰陣我修讀科學，理想成為導演或者生物學家，所以Frank Herbert將生態學融入小說中嘅手法，對我嚟講好新鮮、好有詩意及深刻，佢對大自然嘅睇法、所創作出嚟嘅生態系統，都非常引人入勝。佢又探索咗殖民主義帶嚟嘅影響及亂局，不但係20世紀的寫照，即使到今時今日仍未過時。」終於可以達成夢想，將《沙丘魔堡》拍成電影的導演非常開心：「《沙丘瀚戰》係心理驚慄片、冒險電影、戰爭片、青春成長電影，甚至係愛情故事。呢本小說多年嚟都喺我嘅書架上及床邊，唔係冇原因。」

作為Tim迷散場後超滿足，大頭靚様放題。張震出埸唔夠五分鐘，但佢角色好重要，最葡萄佢可以摸Tim仔塊面。全程如身歷其境，頂級視聽觀影感受，服裝道具超靚，細節亦好有驚喜，好少睇戲用享受嚟形容，呢套可以。