港姐2021丨冠軍宋宛穎出身選美世家 婆婆爆Sabina媽咪幕後功臣

《2021香港小姐競選決賽》於昨晚（12日）完滿結束，8號宋宛穎(Sabina)當選成為今年港姐冠軍，15號梁凱晴及14號邵初則分別奪得亞軍及季軍。冠軍Sabina完成訪問後，約凌晨1時乘坐大會七人車離開，返回火炭寓所。 家人和一位可愛的小妹妹在門外迎接出爐港姐冠軍回家。問到Sabina會怎樣慶祝？經過3個月努力Keep fit 的Sabina表示：「想食嘢先，依家最想食係炒飯，不過聽日要做嘢，所以只可以食少少，遲啲希望約埋一班佳麗一齊去打邊爐。」問到會否另外再約幾位好姊妹慶祝，Sabina都相當識做，表示其實12位佳麗感情都非常要好。

Sabina的親朋戚友亦在家中坐定定迎接Sabina 凱旋歸來，而TVB亦派出攝製隊與Sabina做家訪，Sabina的婆婆親手為孫女整蛋糕，同時亦預備了雞翼、咖哩角等各式小食，看見家人細心的安排，Sabina笑說：「好感動呀，真係好耐冇食，我過我都唔敢食太多！」昨晚有到現場為孫女打氣的Sabina婆婆笑言睇到眼濕濕：「我哋全家都好開心，佢媽咪喺澳門仲緊張，約咗幾十人一齊睇同慶祝，個個都嗌到不得了，Sabina嘅表現幾好呀，叫做過骨喇！」Sabina反而覺得上次準決賽的表現比今次還要好：「我會畀90分自己，有10分係進步空間。」

Sabina的婆婆大數家族威水史，表示Sabina媽咪、堂家姐與堂妹也是澳門小姐出身，而婆婆一輩亦有人贏過加拿大小姐及三藩市小姐，婆婆大爆 Sabina媽咪是今次奪冠的幕後功臣， Sabina 坦言： 「媽咪真係軍師，每一餐都要佢批准，要影相畀佢睇，要佢通過先可以食。我自己比較喜歡喺鏡頭前演出，希望經過今次之後，有機會喺呢個圈發展。」Sabina多謝媽咪在比賽期間經常會給她中肯的意見，對於孫女Sabina 的表現，婆婆就覺得問題環節爭少少，有待進步。