【獨家】約友傾工作不停哈哈哈 許鞍華笑到變人型表情包

許鞍華導演今年雖然74歲，但佢冇停落嚟仲係咁不停拍嘢，早前紐約亞洲電影節更頒咗個「終身成就獎」畀佢，讚揚佢為影壇出鞠躬盡瘁。日前，許鞍華約咗兩個女友人喺天后一間Cafe傾工作，三個女人果然一個墟，睇住電腦係咁講係咁笑，許導演更笑到見牙唔見眼，小朋友式開懷笑容，好鬼可愛。採訪:梁志明

許導演成世人為電影界出心出力，之前香港電影導演會年度頒獎典禮，憑藉《好好拍電影》獲得「新晉導演」獎的文念中就表示：「要多謝許鞍華導演當年一口答應，同埋不厭其煩畀我和團隊跟拍了多年。」唔只自己出心出力，仲好提攜新人，傳承好重要，呢啲就真係為影壇嘞。

開心就好
日前下午，《頭條日報》記者見到許導演同兩個女友人喺天后一Cafe傾嘢，見佢哋枱面得番飲品，估計已食完嘢去到傾嘢環節，而有老花嘅導演要除低眼鏡望自己嘅手機，望完一陣再睇友人嘅電腦，睇睇吓係咁笑，笑到岳高頭兼見牙唔見眼，相同動作係咁Loop，好想知佢睇咩睇到咁好笑，總之導演傾得好肉緊，手部動作超多，啲笑容仲多到可以用嚟做表情包。