【独家】约友倾工作不停哈哈哈 许鞍华笑到变人型表情包

许鞍华导演今年虽然74岁，但佢冇停落嚟仲系咁不停拍嘢，早前纽约亚洲电影节更颁咗个「终身成就奖」畀佢，赞扬佢为影坛出鞠躬尽瘁。日前，许鞍华约咗两个女友人喺天后一间Cafe倾工作，三个女人果然一个墟，睇住电脑系咁讲系咁笑，许导演更笑到见牙唔见眼，小朋友式开怀笑容，好鬼可爱。采访:梁志明

许导演成世人为电影界出心出力，之前香港电影导演会年度颁奖典礼，凭藉《好好拍电影》获得「新晋导演」奖的文念中就表示：「要多谢许鞍华导演当年一口答应，同埋不厌其烦畀我和团队跟拍了多年。」唔只自己出心出力，仲好提携新人，传承好重要，呢啲就真系为影坛嘞。

开心就好
日前下午，《头条日报》记者见到许导演同两个女友人喺天后一Cafe倾嘢，见佢哋枱面得番饮品，估计已食完嘢去到倾嘢环节，而有老花嘅导演要除低眼镜望自己嘅手机，望完一阵再睇友人嘅电脑，睇睇吓系咁笑，笑到岳高头兼见牙唔见眼，相同动作系咁Loop，好想知佢睇咩睇到咁好笑，总之导演倾得好肉紧，手部动作超多，啲笑容仲多到可以用嚟做表情包。