首度上台表演跳舞 陳倩揚讚3歲女兒好勇敢

陳倩揚今晚出席舞蹈學校周年匯演時，表示現年3歲的女兒陳希桐（Aurella）學習爵士舞及芭蕾舞，當見到女兒為了今次表演在家中對鏡練舞，令她覺得期待畫面終於出現。她說：「好開心佢有一個興趣，咁細個唔知佢鍾意乜？等佢適齡參與唔同興趣班可以感受一下，原來佢好鍾意，因為每次上堂後會自己準備跳舞服裝，學完之後又會跳畀家人睇。」

她表示女兒首次在大舞台演出，但認為無論表現如何也是成長的一部分，又大讚女兒好勇敢，因為女兒本身好慢熱，但好願意跟隨不認識的姐姐入場。她說：「我好驚訝呀！平時返學都會喊，始終女仔會嗲。」她又爆跟老公也帶備攝影器材為女兒影靚相，自己帶了兩部電話，老公則有不同鏡頭拍攝。她說：「老公係生女之前買嚟嘅攝影裝備，唔係用嚟影老婆！」