【獨家】希望再進修推廣健康飲食　陳倩揚盼《你得II》玩減肥真人騷

2018年，陳倩揚（Skye）誕下第三胎女兒Aurella後，靠自創飽住瘦的「低醣飲食法」，由最高峰的160磅減至106磅，並於Facebook group「你得我得行動組 by Skye」分享心得，至今吸納12.7萬Followers！成功轉型「減肥KOL」的她，近日更為香港開電視節目《你得我得大家得》任主持，邀得姜皓文、喬寶寶、梁嘉琪等大談健康飲食，Skye盼開《你》第二季拍真人騷，自己亦計劃再進修。採訪：黎寶倫　場地：Mini Central

因減肥迎來事業第二春，自稱「資料整合員」的陳倩揚，感激團隊背後的付出及組員的嘗試，造就無數成功例子。她又謙稱仍須努力學習，望下個學期能修讀相關課程，例如營養學，從而帶給粉絲更仔細、深入及專業的資訊，「身邊好多醫生、營養師都叫我去讀書，覺得我應該好易吸收，但始終有3個小朋友又要工作，我都希望盡量平衡工作同家庭，同時可以Keep住增值。（兼顧到？）時間唧出嚟嘅，自己瞓少啲囉，我都好鍾意呢份工作，每晚都用一個鐘睇晒大家嘅問題，盡力去答，從佢哋身上都學到嘢，因為群組入面臥虎藏龍，所以唔會攰或悶。」

好多拍攝Idea
問到會否轉行？Skye表示仍很喜歡幕前工作，「我都好想再喺電視平台做多啲，例如真人騷，去人哋屋企煮飯，或者同圈中朋友一齊煮一齊食，甚至一齊減肥、做運動。」並坦言曾提議《你》監製找喬寶寶拍減肥真人騷， 惜最終時間、製作上未能配合，「寶寶都想身體好啲，喺警號響起前及時預防。」至於有否打算擴大事業版圖，經營瘦身中心或健康食品？喜歡循序漸進的她說：「未成氣候住，最緊要大家關注飲食可以令身體健康，唔係話諗要點賺錢，喺其他崗位能穩定到我生活就夠，我唔需要過奢華嘅生活。」