【獨家】周五首與WHIZZ同台Jam歌　岑寧兒樂見本土Indie成主流

岑寧兒（Yoyo）將於本周五（6日）聯同王嘉儀（Sophy）、陳嘉、樂隊WHIZZ，假旺角麥花臣場館舉行《大世代OVERLAP》音樂會，屆時4個單位會進行Crossover演出，Yoyo率先透露與WHIZZ互唱大家的歌，「第一次同佢哋合作感覺好青春，好開心，因為我冇組過Band，所以都鍾意同Band夾吓，佢哋嘅默契同平時啲樂手睇譜有啲唔一樣，會用自己互相玩緊嗰段嘢、最重視嗰Part，佢哋一講就知講邊Part，跟住我就唔知佢哋講邊Part囉，但合作又唔會困難，因為綵排之前都有溝通、整Demo。」

是次音樂會由《樂壇已死》幕後班底策劃，由王雙駿擔任音樂總監。對於本港「樂壇已死」這個說法，移居台灣10年的Yoyo今年終「回流」，稍後更推出首張廣東專輯《風的形狀》，她表示當年離開香港到台灣發展，並非因唔睇好本土市場，「當年去台灣發展係因為寫咗好多國語歌，10年前喺呢度（香港）同啲唱片公司傾，嗰陣時氣氛又唔係好似而家咁多唱作人，我自己都唔係好Sure想做啲咩音樂、冇而家咁清楚個風格，所以搵嘅時候，如果畀我嘅空間未必夠、佢有想要我做嘅嘢的話，我就唔夠膽答應，但喺台灣做Indie相對空間啲，亦較易遇到啲人一齊玩。不過去年底返嚟，而家又好似容易遇到啲人一齊玩，Indie愈嚟愈Major，我覺得呢個係趨勢。」這兩年遇上疫情，Yoyo也決定暫別「空中飛人」的生活，留港籌備新專輯，同名新歌《風的形狀》亦於上月推出。


撰文：黎寶倫　攝影：譚壹致　髮型：Sam Lo @Orient 4　化妝：On Ki Lau