【獨家】周五聯同岑寧兒陳嘉開Show　王嘉儀大讚老闆麥浚龍是暖男

首屆《超級巨聲》出身的王嘉儀（Sophy）一直以獨立歌手身份闖樂壇，去年更憑專輯《殘》獲金音創作獎兩項提名，今年由台灣回歸香港發展的她，上月中宣佈加盟麥浚龍（Juno）主理的幻・國文化，本周五（6日）更聯同岑寧兒、陳嘉、WHIZZ為《樂壇已死》班底策劃的《大世代OVERLAP》音樂會Jam出新火花。Sophy直言樂見大眾對本地音樂的關注度愈來愈高，自己亦會繼續努力創作。撰文：黎寶倫　攝影：張詠森　化妝：leo tam　髮型：toyo ho　造型：somad

常說「樂壇已死」，入行12年一直創作音樂的王嘉儀卻不認同，甚至對香港樂壇充滿希望，亦對廣東歌有情意結，故會堅持做好音樂，「當有人話樂壇已死，但其實有股力量都重生緊，或者係一個新生命發展緊。（新生代歌手更團結？）喺香港做音樂有種互相扶持嘅感覺，特別係我頭幾年自己做，好多朋友都仗義幫手，可能近年目光多咗就發現大家嘅凝聚力、親切感，見到百花齊放我都好開心，希望唔同Style、有才華嘅人愈嚟愈多機會。」

同Juno有機會合作
在台演出後，令Sophy領悟到創作需跳出Comfort zone外，也讓她遇上幻・國團隊並一拍即合。正籌備新專輯的Sophy盼在內容上更成熟、大膽，「愈大膽就愈多養分畀樂迷，呢個年代大家接受嘅嘢好闊，所以我期待更多嘢玩，嘗試唔同曲風。（同老闆出合唱歌？）都唔排除。」說到曾跟Juno會面，她大讚對方好溫暖，「記得有次為佢演出做開場，食飯嗰陣佢嗌多咗盒菜，所以畀咗我食，令我發現佢係暖男。佢都好支持我做音樂，叫我Keep shining，好窩心。」