【獨家】主持《大匠之峰》跟名廚偷師　蔣怡怕冇晒煮食樂趣拒開餐廳

名模蔣怡近日為香港開電視飲食節目《大匠之峰》擔任主持，先後於法國藍帶廚藝學校及中華廚藝學院學藝的她，乘機從大廚身上偷師，「其實學咁多嘢都係希望做飲食節目時，可以更加知道點介紹，同埋話畀觀眾聽師父點樣叻，當然自己都Enjoy煮嘢同食嘢。」蔣怡坦言湊小朋友好辛苦，下廚就成為一種減壓方法。採訪：黎寶倫　化妝：Gary Cheng@HELPMAKEUP　髮型：Keith Wong@pi4.com.hk　場地：Chill And Grill

所謂「工欲善其事，必先利其器」，熱愛下廚的徐菁遙擲200萬豪裝廚房，蔣怡就拒絕廚房大翻新，皆因擔心一個禮拜冇得煮飯會頂唔順，隨即她大爆老公甜爆舉動，「因為抽氣扇太低，我煮嘢成日要彎腰或擘腳，搞到腰痠背痛，後來老公搵人改咗個抽氣扇，但一改就一日半，小朋友冇得準時開飯，我已經好𤷪𤺧，不過老公諗到呢一點都窩心。」

蔣怡連麵包都自己焗，一對仔女和老公都變食家，近期忙為節目及新書《蔣怡Chef Coco想煮就煮》宣傳的她，惟有出門前醃定三餐食物，讓工人翻熱或蒸焗給他們食，「而家都叫自己放低啲，畀多啲機會姐姐學，日日揀啲簡單中菜食譜畀佢煮，佢學唔到就幫唔到我。」雖然疫情下日日煮到煩，但蔣怡仍能Keep住變出新菜式，原來靈感來自Cooking Show與出外用餐，「呢一年半好多人跟我IG煮，我今晚食乜就Po乜，好實在，簡單又慳錢，幫到咁多人我都好開心。（開餐廳分享美食？）冇諗過，喺香港開餐廳好難賺錢同維持，好驚最後為生意失去咗煮食嘅熱誠，加上有小朋友，我煮嘢係好執着、好難假手於人，所以冇可能做到。」