【獨家】投資6位數母女檔開音樂會 劉雅麗唔怕蝕錢最多白做

疫情緩和，劉雅麗(Alice)急不及待同媽媽包曉華於8月3日假文化中心舉行一場《我和媽媽有個約會》音樂會，今次Alice全資6位數字做老細，兼一腳踼做埋監製，笑言出錢又出力去捧紅74歲嘅索媽媽：「捧紅咗佢，我咪可以退休囉！趁佢仲咁索，又唱得，sell溫情嘅母女檔音樂會唔多，應該有market喎！」採訪：方騫平 攝影：梁志明

日前劉雅麗媽媽曉華姐到狗公園放狗，帶住14歲來福慢跑，順道為8月音樂會備戰練吓氣。今次演出對曉華姐嚟講有啲難度：「佢話捧紅我，畀多啲歌我唱，到時要唱成20首歌，死啦！年紀大，背唔到咁多。」劉雅麗則說：「我拍住佢唱，我壓力都大㗎！我成日話我做唔到青出於藍，其實鍾意做音樂劇，都係自細受媽媽影響。」

雖然演出場數只批到一晚，而且入場觀眾得七成半，有啲失預算，但劉雅麗冇工開年幾，都唔想再無了期等落去，開住一場試水溫先，反應好就係9月移師其他場地開part 2。自資6位數的劉雅麗唔擔心損手離場：「計過數，最差都係白做冇人工，因為我哋第一次搞show，好多朋友都會買飛撐場，昔日演藝學院同學王祖藍買20張，劉德華好錫我媽咪，就算唔喺香港都會買飛撐場。」劉雅麗爸爸係生意人，跟華哥及發哥有淵源，發哥係劉爸爸契仔，經他介紹識埋華仔，當年華仔想喺廣播道租屋獨居，搵劉爸爸幫手搵租盤，劉爸爸建議他買樓，仲叫發仔帶埋華仔去登台搵首期，最終做成業主。曉華姐大讚華仔有情有義：「有段日子冇同華仔聯絡20年，點知我哋因為樓宇轉按問題，要10幾萬嚟應急，華仔即幫手，上次佢開演唱會，都有幫我哋撲咗30張飛，仲喺第6行㗎。」