冒炎熱天氣郊外拍廣告 Gin Lee為同貓貓培養感情餵蚊都制

2021-06-24 00:00

延續時裝品牌的上輯廣告，作為專業貓奴的李幸倪（Gin Lee）今次親親大自然到郊外與貓咪齊齊拍攝。Gin笑指貓貓令她甘心走出冷氣房：「早前因為疫情，天氣又好熱，好多工作都變咗廠景。但今次係延續上輯廣告，透過跟住貓咪嘅足跡，發現愛護大自然嘅重要，有意義又有故事性，拍外景我都絕對唔介意！」

Gin育有愛貓「杏仁糊」，之前又以歌曲《開燈。熄燈（熄燈版）》紀念去年4月離世的貓貓「芝麻糊」，拍攝時她與小貓Model同樣好合拍。休息期間，貓貓更躺在她身上睡着，令她動彈不得。Gin冧爆表示：「可能小貓見我化妝坐喺度唔郁，就跳上嚟休息吓。呢個係培養感情嘅方法，梗係唔可以趕走佢啦！我哋喺戶外拍攝，好多蚊出嚟『搵食』，我怕太大動作會嚇親貓貓，所以俾蚊咬到皮膚又紅又腫，不過只要貓咪舒服就值得。」