方力申遭爸爸爆料帶過唐詩詠陳瀅馮盈盈返屋企

2021-06-19 15:51

《日日媽媽聲》今晚播出最後一集，適逢父親節，請來星級父親區永權、楊潮凱、周志康進行大平反，當中更包括首席創意官王祖藍。祖藍與節目組當初設計了「大逼供」及「生仔陣痛」兩大酷刑「炮製」星級爸爸，這集主持決定以其人之道還治其人之身。祖藍先接受車輪轉逼供，如「兩個囡囡同老婆跌落水救邊個先」、「點解要個女咁細個做家務」、「點大男人法」等等，其中問到如被囡囡撞破與老婆行房時會如何自處？祖藍先搞笑謂：「我會繼續！就係個女咁細個乜都唔知，咁做乜要停？」祖藍又謂不擔心女兒將來身高問題：「唔使愁，我低頭望佢嘅時間唔係剩番好多。」
同場還有方力申帶同爸爸、媽媽參與錄影，同小方一樣玩得的方爸爸，恨飲新抱茶恨到出面，自爆搭車都幫小方物色對象，又開出理想新抱三大條件。方爸爸又大爆小方先後帶過唐詩詠、陳瀅及馮盈盈回家，嚇得小方急忙解畫。