【調教你MIRROR】Tiger冇信心跳唱壓力大 Jeremy年初失單飛機會陷低潮

ViuTV的《調教你MIRROR》昨晚播到第4集，經理人花姐覺得Tiger（邱傲然）不夠上進心：「睇完佢《造星》第一Round跳拉丁舞，我已經覺得呢個男仔勁Charm，但佢的確有好多缺點。隱形、成日唔出聲、表演又唔係最落力，畀晒機會佢企中間都唔要。」今年22歲的Tiger是隊中最年輕成員，因而經常想先讓機會給其他人，令花姐心痛又激氣，「如果幾年後MIRROR唔紅，你就冇機會表現自己，冇得等㗎！」她期望Tiger可以更加Aggressive（進取）。

梁祖堯（祖祖）為一眾鏡仔安排演唱會，讓各人在學習和音前都有Solo機會。祖祖認為：「大家都想做一個作品嘅Center，有獨特表現。所以先要學和音，因為做咩位都係咁重要。」Tiger選唱張國榮的《今生今世》，他自爆好緊張：「最大感覺係緊張，唔知點解，紅館做嘉賓都試過啦！好少喺11個兄弟面前咁樣唱歌，當人哋同自己都有期望，就更加有壓力。」Tiger更表示就算是擅長的跳舞也一樣。祖祖希望他「畀多啲信心自己，一唱就Feel到好緊張」。

Tiger最後在學唱歌環節主動爭取唱多次，而且大有進步，獲祖祖讚他悟性好高。祖祖昨晚亦更新其「一日一鏡仔」系列的Tiger篇，他上載自己親自錄影，對方在節目中唱歌的片段表示：「老虎係個old soul，年紀輕輕又穩重又成熟。認識咗佢嘅父母之後，我就明白了。呢一對非一般嘅父母，信任佢，畀佢經歷畀佢飛，就成就左呢一個咁有才啦，又咁孝順嘅孩子。呢條片，其實係送給虎媽媽的^_^多謝你的招待，好期待再來你家食飯呀。」

另外花姐又透露曾想讓Jeremy（李駿傑）單飛：「其實每年我都會揀人下一年年頭Solo，2020年新年我同Jeremy講，其實我有考慮2021年年頭畀你單飛，不過你仲有啲不足，要改善我先可以捧你。佢當時好興奮好開心，但最後都做唔到要求。其實唔代表冇機會，不過可能唔係今年，跟住佢就陷入第二次低潮。」

花姐續指：「我覺得佢好啱單飛，但如果改唔到缺點係好冒險。例如佢行妖路線OK，但身形唔算非常好；高音好好，但把聲好薄，如果一個人唱晒成首歌會好刺耳。佢唱歌好聽，但唔可以持久咁聽。加上機會問題，可能唔太好彩，於是佢暫時冇單飛機會。」祖祖在Jeremy演唱時也拖實他表示支持。

Jeremy自覺唱得不差，不明白為何沒有機會：「慢慢發覺MIRROR入面有Solo同冇Solo成員差距愈嚟愈大，令我有好多負面情緒。頭兩年我對單飛冇咩概念，到咗今年開始有呢個欲望，見到阿Jer（柳應廷）喺《叱吒》台上拎男新人金獎嗰刻，我都想試吓做到，話畀人知我係MIRROR嘅Jeremy。」

較擅長跳舞的Alton（王智德）都表示有少少緊張：「狀態未去到好放鬆，大家都係選秀節目出身，一嚟就有演唱會、有好多人支持，個Pace（步調）係快過我哋成長。希望可以調教實力，各方面都要成長。」Frankie（陳瑞輝）就表示：「克服咗少少唱歌陰影，但都係冇咩信心，因為而家聽得出自己有咩缺點。唱歌一開始對我係包袱，但做MIRROR又一定要唱歌，而家慢慢欣賞同鐘意呢件事。」

Stanley（邱士縉）就獲祖祖大讚「唱歌把聲好聽」，更笑指要他用唱歌聲講嘢。單飛原來不是Lokman（楊樂文）的首要目標：「唱歌冇咩信心係真嘅，可能我冇諗過用歌聲做主打。比起Solo，我更想兩三個人出一首歌，一齊玩力量更大更豐富。」他又自覺唱歌不夠好，所以才要在MIRROR負責Rap部分。已有機會單飛的姜濤、Ian（陳卓賢）、Anson Lo（盧瀚霆）、Anson Kong（江𤒹生）、Jer及Edan（呂爵安）表演時則明顯比較自在。