【調教你MIRROR】勸Fans勿阻礙拍攝 姜濤呻「私追」粉令MIRROR變散沙

ViuTV《調教你MIRROR》昨晚播到第7集，今集沒有調教任何一位成員，因為攝製隊在梅窩拍攝時遇上突發情況。超過50位「私追」鏡粉在現場阻礙拍攝進度，令MIRROR只能留在酒吧篤波，本身安排的戶外活動亦被迫取消。「私追」粉絲問題最嚴重的是姜濤，最後12位鏡仔決定集體向粉絲表明立場。

經理人花姐笑言姜濤做甚麼都有人喜愛：「唔使好用力幫佢Plan，唔使執著佢條頭髮好唔好睇，唱歌好唔好聽，一行出嚟就有人鐘意。」即使係萬人迷，姜濤對自己都幾有要求：「我做音樂想以自己諗法為主，就算花姐有啲位唔認同，我都會堅持去做。寧願大家覺得唔好，我先再改。我唔太擅長Social，知道一出街就俾人認到係好多Artiste追求嘅事，但我初心只係想表演畀大家睇。」花姐又指姜濤對自己要求好高，而且好自我，雖然他眼光獨到，不過「唔代表係啱」。


梁祖堯（祖祖）透露拍攝第二日，MIRROR被困在酒吧無法出外：「就算有幾鐘意篤波都篤咗4個鐘，開始眼瞓同悶。當知道好多戶外Item因為Fans出現阻礙拍攝，好多設計咗嘅嘢做唔到，甚至預視到呢個假期要喺酒吧度避。」成員商量後一致通過，亦得到節目組批准，決定出去向Fans表達事件嚴重性，直接勸喻離開。最後由隊長Lokman（楊樂文）和「梅窩隊長」姜濤代表發言。祖祖也一直與花姐視像通話交代情況。

MIRROR成員在馬路上的安全島一字排開，Lokman先開口：「其實你哋成日山長水遠咁入嚟，由朝等到晚，我哋係開心嘅，但都好心痛。節目組安排好多唔同議題同活動畀我哋了解自己，成為更好嘅自己。但因為大家太熱情，有時阻礙咗拍攝。我哋都想做更好嘅自己，亦想拍一個更好嘅節目，畀大家感受吓我哋係點嘅人。希望大家可以畀多少少空間我哋同製作組，令我哋製作更完美嘅節目畀大家欣賞。」

AK（江𤒹生）接着表示：「今次節目對我哋12個好難得，因為好難夾檔期。第一日入Camp，節目組希望我哋喺呢個Trip可以暫時放低偶像身份同MIRROR呢個包袱，重新感受年輕人應該要做嘅嘢。你哋每次活動早到又遲走，我哋開心又痛心，將來我哋仲有好多機會見面影相，節目出街大家就會明白點解我哋要企出嚟講呢件事。」

姜濤先向Fans講「辛苦晒」，之後他向姜糖（姜濤粉絲稱呼）道：「其實一直以嚟好少公開同Fans講說話，包括私追嘅問題。好開心大家陪住我，但喺呢個Trip，大家行為的確令我有少少唔開心。我唔想隱瞞，因為大家係我Fans，我有責任保護你哋。唔想你哋俾我以外嘅人話，與其俾工作人員話，不如由我自己講出嚟。冇諗過大家存在會阻礙工作，辛苦大家一直嘅等候，但希望有個雙贏嘅局面，大家可以返屋企休息。」

姜濤繼續說：「無論係今次定以後嘅拍攝，大家畀少少空間我哋，一來大家有危險，二來真係阻礙到我哋工作。希望大家以後可以成為令我驕傲嘅一份子，唔想大家或我都難做。唔阻止大家繼續留低，係你哋自由，但如果私追跟得太貼嘅話，我唔會畀任何反應大家，希望大家快啲離開。」最後MIRROR向粉絲鞠躬。祖祖表示：「Feel到MIRROR一早因為私追而有心結，其實每個人都好想解決。」

姜濤事後再談起此事，「好難忘，因為係第一次冇花姐、冇任何經理人之下自己面對呢種事。出道以嚟私追問題都係造成內部矛盾原因之一，大家團結面對好難忘。」Tiger（邱傲然）坦白表示：「應該一早要解決，之前拍《男排女將》Fans已阻礙拍攝，但未試過12人集合力量去勸大家。」

姜濤認同今次是MIRROR團結的里程碑：「我哋懷疑過大家係咪一條心，會以為有人私下叫Fans嚟。唔敢講一直好團結，大家因為唔同原因而不斷又團結又散，花姐都唔敢拎出嚟講，怕一講MIRROR就會冇，所以今次大家咁團結我好開心。」