【獨家】工作勁忙嘆日菜慰勞自己　Eric Kwok放假湊愛犬買外賣

曾為ViuTV選秀真人騷《全民造星》擔任導師的Eric Kwok（郭偉亮），最近為無綫主持音樂節目《勁歌金曲》，又為歌唱比賽《聲夢傳奇》任評判，忙到七彩的他仍不忘陪下「囝囝」，早前《頭條日報》記者撞到佢帶愛犬「金菠蘿」（菠蘿）落大坑，仲買高質日本料理返屋企嘆。採訪：張詠森

最近除了忙於錄影TVB節目，Eric Kwok亦要兼顧YouTube Channel「Round Table Poker」短片拍攝。即使工作排到密麻麻，攰到篤篤吓手機都喺沙發瞓着，但一得閒唔使開工，錫到愛犬「金菠蘿」燶的他，都會同太太葉佩雯一齊拖狗狗出街散步。早前下午2時許，穿紅Tee、戴紅Cap帽，成個「利是封」咁款的Eric，揸住紅色坐駕到大坑買外賣，而大腿上仲見到菠蘿；車輛停泊一邊期間，牠更探頭出窗外八卦，企到攰又將下巴托喺窗邊，Cute到暈！

Eric好識食
終於可以落車唞吓，Eric從車尾廂取出寵物手推車，被爸爸放到手推車上的菠蘿，立刻揈一揈舒展筋骨，有街街去的牠更興奮到狂擺尾巴、吐出舌頭，非常精靈！之後，Eric孭好袋便推住車仔，步行至鮨辰日本料理落Order；該店一個Lunch set平均約二、三百蚊，最出名食Omakase（廚師發辦），睇嚟Eric食個下午茶都好講究。向職員點好餐後，兩父子企喺門外等，最後拎埋嘢食就揸車返歸。