衰多口爆最愛承諾唔再開Live 柯震東冇口齒直播瞓晏覺二萬人圍觀
2021-05-31 13:30 
柯震東日前與多名藝人包括大飛、黃宏軒和洗菜深夜IG直播吹水，唔覺意大爆曾想娶蕭亞軒，又指最愛係李毓芬，衰多口搞到好麻煩，柯震東事後已經道歉及承諾唔再開直播，話口未完，中哂直播癮的他昨日又開Live，今次係直播瞓晏覺！
柯震東先在IG Story發起投票，看多少Fans會想觀看他畫面全黑的瞓覺直播，結果有89%的Fans投票想睇，柯震東大驚並再次上載Story笑Fans：「你們好奇特！」結果柯震東回應Fans要求，在下午2點開始直播瞓覺，直到3點50分左右先瞓醒。長達兩小時的直播畫面Keep住黑色，更伴隨陣陣呼吸聲，但仍吸引大量Fans收睇，到柯震東瞓醒，竟有接近2萬人同時觀看！
瞓醒後的柯震東被嚇親，笑說：「竟然有這麼多人在看我睡覺，我平常講話都沒這麼多！」更自爆剛剛發惡夢，夢到多了一個鬼妹女友，說道：「我們一齊洗澡，她就跟我說懷孕了，還說要生下來。」搞笑率直的發言引來Fans爆笑，留言：「這什麼邪門睡教？」、更搞笑問佢有無發春夢！昨晚佢再更新IG Story向Fans求救，原來呢場晏覺搞到佢下巴甩臼，仲要食唔到嘢，深夜時份只好拎返以前嘅消炎藥食住先。
關鍵字
最新回應