經理人同Fans夾計送生日大驚喜 佘詩曼收528枝玫瑰感動爆喊

5月28日是佘詩曼46歲生日，雖然她身在上海工作，未能跟一班好姐妹慶祝，但一樣收到不少祝福，繼收到偶像張曼玉送上生日卡及禮物，原來阿佘更得到經理人和Fans夾計製造的超級驚喜，令阿佘不單即場感動爆喊，更要化身「花女」。

講到經理人和Fans的「設局」，先由經理人預早向阿佘表示安排了媒體拍攝開始，為了做到零破綻，經理人更安排阿佘綵排了45分鐘，夠晒認真。正當阿佘準備十足推門進場時，驚見一眾粉絲歡呼起哄，並送上生日日期「528」枝玫瑰一刻，平日硬正的阿佘亦被感動到喊。阿佘提起仍難掩興奮，「我真係零防備下，surprise到我，好多謝經理人同粉絲設左呢個局，花了好多心思，去製造既感人又驚喜環節，仲有第一次收到500幾枝花，真係好耐未試過喜極而泣，他們所造的一切令我感到好幸福。」

向來有善心的阿佘，今次更將「好運」跟更多人分享，將收到大量玫塊花跟一眾鄰居共享，「我係愛花之人，但屋企根本冇咁多花樽，但又唔捨得拿掉，突然諗起可以同鄰居分享，助理喺group chat 一問反應非常踴躍，所以在party後我就充當『花女』，逐家逐戶去派花，希望大家都分享到祝福同好運。」對於收到偶像張曼玉的祝福，阿佘頓時由偶像變成小Fans，「我真係開心到成晚都瞓唔着，不斷研究佢啲字體，包裝全部都好有taste，唔識講，作為小Fans收到生日禮物，真係好快樂好sweet，佢啓發到我更加要愛錫fans！」