【Juicy叮】揭外傭意外懷孕逼墮胎 女僱主：我係佢老細

外傭意外懷孕，作為僱主應如何處理？有診所助護分享，日前有女僱主帶同外傭大鬧診所，要求為意外懷孕的外傭安排即日墮胎，言談間更直指「我係佢老細」、「你唔落我就掉你返去」，令助護大感無奈，認為該名僱主無權自行決定一切。

社交媒體Facebook專頁「診所低能奇觀」分享指，日前有女僱主帶外傭一同到診所，到步後便劈頭要求為該名外傭寫信，助護一問之下，對方就激動表示外傭意外懷孕，要求驗孕之餘，更指「驗真啲呀！係有咗嘅話就即炒佢呀！一毫子都唔會畀呀我」，而外傭則全程低頭默不作聲。

當助護正思考解僱外傭的做法是否合理時，該名女僱主竟突然表示「佢想繼續做嘅就一陣畀醫生即刻落咗佢」，令助護嚇一嚇表示該診所只能提供驗孕及寫證明的服務，示意可以幫忙轉介，屆時對方再自行預約時間，又指這件事其實需由外傭自己決定。

不過女僱主則表現得相當急躁，指「我要返工㗎，今日已經係專登請假，我冇第二日㗎啦」，再三要求診所即日處理她的要求，甚至彈出一句「我係佢老細呀」，更大聲問外傭：「你仲要唔要喺度做呀？你係咪食我住我呀？你唔落我就掉你返去㗎啦，機票錢我俾唔起咩？」

女僱主之後再次問助護：「我要今日即刻落咗佢，你做唔做到，你做唔到我畀錢第二個做兼以後唔會再嚟！我俾一分鐘時間你諗清楚」，而助護只無奈表示「無得做」後，女僱主便帶著外傭離開診所。

帖文一出，不少網民都紛紛留言表示，雖然理解外傭任職期間懷孕，作為僱主會非常「頭痕」，但亦認為該名女僱主的行為及言論相當不尊重外傭，「奴隸咩」、「畀幾千蚊人哋請人工作就可以主宰人哋生命？」、「咁黑心嘅」、「都已成事實，何必咁樣對個姐姐！」、「人哋都係打份工啫，落唔落個仔到佢話事咩，以為自己係邊位」。

根據勞工處資料，除非外傭因犯嚴重過失而遭即時解僱，否則僱主由外傭經醫生證明書證實懷孕之日起至產假結束而應復工之日為止，不得解僱該外傭。僱主如違反上述規定，可被檢控，一經定罪，最高可被罰款港幣10萬元。此外，僱主須向外傭支付解僱代通知金及其他相關賠償款項。被解僱的外傭亦可根據《僱傭條例》向僱主追討不合理及不合法解僱的補償。

資料來源：「診所低能奇觀」FB