女友長期公開私生活 C朗湊仔玩韆鞦𠱁𠱁轉絕密照曝光

36歲嘅球星C朗(Cristiano Ronaldo)同超好身材嘅27歲女友Georgina唔經唔覺拍咗5年拖，來自阿根廷嘅索女友本來喺名店做Sales，多得C朗「點燈」由Sales仔變身上流人，IG Followers有2416萬人，一家六口住8600呎超級豪華城堡，仲做埋Model，拎住名牌影相放IG就可印印腳收錢。

C朗嫂平日工作除咗湊仔就係晒命，着名牌性感衫同拎住成堆名牌影相放上網，背景唔係屋企就係私人飛機或巨型遊艇，女人睇到好葡萄，因為瘋狂炫富行為而犯眾憎，唓，咁人哋Po你可以唔睇嘅啫。可能睇中C朗嫂鍾意晒命嘅行為，Netflix邀請佢拍真人騷紀錄片，節目將向觀眾揭露C朗嫂嘅日常生活，即係睇IG嘅電視版囉。

Po得多性感相可能有啲悶，C朗嫂今次玩溫情，Po一家六口去遊樂場玩嘅相，難得見到C朗抱住個女玩韆鞦及同仔女一齊玩𠱁𠱁轉，小朋友玩得好開心，啲片冇聲但隔住相都Feel到佢哋有幾開心，重點係C朗全程都戴口罩，一直知道佢自控能力好強，估唔到中過招嘅C朗對抗疫都冇鬆懈過。