【獨家】見鄭中基綵排自駕騷辛苦　余思敏湊完仔再買燒鵝慰老公

鄭中基（Ronald）近日密鑼緊鼓為明晚（23日）假中環海濱活動空間舉行的自駕騷綵排，太太余思敏就一盡賢妻責任，照顧好小朋友及一日三餐，好讓老公專心工作。日前傍晚「Ronald嫂」獨自現身銅鑼灣，準備接一對仔女放學的她，走到附近餐廳斬料加餸，估計是見老公日夜緊密排練，所以買隻靚燒鵝慰勞對方。採訪：梁志明

鄭中基（Ronald）將於明晚展開一連3場的全港首個自駕戶外演唱會《Drive In Ultra – WEE are Ronald Cheng》，由於疫情令不少大型騷煞停，門票開賣冇耐，港幣6000元的車輛套票已火速被餓足多月的樂迷們掃光，反應熱烈！上月初才宣佈開騷的Ronald，近來也「閉關」專心跑步練氣、練結他及歌。雖然爹哋忙住排練，但兩個寶貝仔女梓喬和梓仁都冇扭計，仲大玩Ronald個唱專屬IG Filter，事後「Ronald嫂」余思敏亦於社交網分享作宣傳。

做阿媽好忙
日前約下午4時，《頭條日報》記者發現余思敏於蘭芳道的甘饕買燒味，身穿粉藍色冷衫披牛仔褸的她，身前孭住個手袋仔、右邊格甩底再夾一個黑色大環保袋，畀完錢從餐廳步出大門後，便將銀包放番入袋、收據攝入褲袋；然後，余思敏把一頭長髮撥埋一邊，拎住部手機側晒頭狂撳。攞完外賣時間啱啱好，她就走到裕景商業中心湊小朋友，相信兩個小朋友剛上完普通話補習班，所以一臉倦容拖實媽咪，而「廿四孝媽咪」余思敏就幫寶貝們拎書包仔，加埋外賣成手嘢！