【駁長啲跑？】隔離期間獲贈兩部跑步機　麥明詩叫吳業坤當舉重托番屋企

早前在日本Working Holiday（工作假期）5個月的吳業坤（坤哥）終於回港，目前接受21日酒店隔離中的他，日日於社交網分享隔離生活，除了開Live同網民傾偈，又得閒彈吓結他、錄吓音、晒吓三餐；正努力減肥的坤哥日前還自爆，獲樓下「隔離院友」送上30粒其至愛的燒賣，搞到他食到牙骹軟晒兼要跑番一個鐘消脂！繼周一獲神秘人把跑步機送到酒店給坤哥後，將於周日（18日）31歲生日的他，來到今天隔離第14日，又收到一部跑步機作生日禮物，原來今次送禮的有心人是「十優港姐」麥明詩（Louisa）。

坤哥剛才於社交網晒出兩部跑步機的合照，他寫道：「多謝麥明詩Louisa Mak份生日禮物，令到我最後一個禮拜，既隔離更充實，而家有兩部係（喺）手，可能呢個會係今年最好既（嘅）禮物因為暫時得佢送。（我諗酒店啲人真係當我痴（黐）線，唔夠一日又多一部仲要更加重）。」一眾網民紛紛搞笑建議坤哥：「左右腳分開跑」、「單雙日子間住用」、「一部朝早用，一部下晝用」，更有人問：「係咪可以駁長啲跑遠啲？」、「到底世人認為你有幾需要跑步先會喺隔離期間收到兩部跑步機呢？」而坤哥就向網民呻走嗰日都唔知點拎走，Louisa回覆：「等睇你開live表演跑住步唱歌（搬走嗰時當weight training囉）。」忽然收兩部跑步機，睇嚟大家都覺得坤哥好需要減肥嘞！